An Neihawk Hnu Thlakhat Hlanah Ralhrang Pawl Ruangah An Thi

May 7, 2022 zan nazi 11:00 hrawngah Yangon, Kamaryut lamzin ah motor cansualnak a thleng ih motor sungih um nupa tuakkhat cu an thi. Kum 30 mi Maung Htet Win le kum 35 mi Ma Chaw Su Hlaing cu April 10, 2022 ah an neiaw, thlakhat hman an neihawk hlanah motor cansualnak an tong ih an nunnak a liam.

An nupa in thuṭhentu lawyer hnaṭuan an si. Rangon ramsung ah ralhrang in zan nazi 12 ihsin zinglam nazi 4 tiang zohman vahsuah an siang lo, himi karlak ih vaksuaktu pawl cu an kai, an kap that ṭheu.

Maung Htet Win tei nupa cu May 7 zan ah an leng ih an rin aiin arak tlai tuk zo, nazi 12 a kim zik ruangah an tlung. Nazi 12 hlan ih inn thleng man dingin motor cakpin an mawng ih cansualnak an tong. Lamzin kap ih platform an pah ngah ih an nunnak a liam.

Mibawmtu pawlkom in, “Motor cansualnak a thleng ti thuthang kan theih veten kan va feh hngal, cakpin motor an mawng ruangah cansualnak an tong. Lamzin kap ih plarform an pah ngah hnuah thingkung tumpi an pah bet, thingkung cu a hram ihsin a thlong thei” a ti.

Motor mawngtu Maung Htet Win cu a hmun ah a thi, a nupi cu siizung ah an phur ih siizung an thlen zawng ah a thaw cem. An nupa ruak cu May 11 sun nazi 2:00 ah an vuiliam. Yangon ramsung ah ralhrang in zan nazi 12 ihsin zinglam nazi 4 tiang zohman vahsuah an siang lo ruangah caan kel ih inn thleng man dingin cakpin motor an mawng ṭheu ih cansualnak tong an um hnuaihni zo.

Be the first to comment

Leave a Reply

Your email address will not be published.


*