Russia, Siberian khua ih um mipa kum 25 mi Stepan in a nupi thar kum 36 mi Oksana cu an neihawk zan ah a that. Stepan hi ahlan ah mi arak that zo ih thawng a tla, thawng a tlak laiah Oksana thawn an hmeltheih aw ih an duhaw.
Oksana in a duh tuk ih a nun cu a tuah ṭha thei dingah a ruat, thawnginn ihsin a suah ding caan cu a hngakhlap tuk. Thawnginn ihsin a suah hnuah an neiaw, an neihawk zan ah rualpi pawl thawn party an tuah ih zu an in.
Party-nak ih um mipa pakhat le Oksana ih umdan cu mopa Stepan in a hmu thei lo, mipa dang na kop tin kut a thlak ciamco. Party-nak ih um pawlin an hmu thluh nan an ṭhen ngam lo, a nupi thar cu a thong, a sit ih a vuak ciamconak ah a thi.
Party-nak ih um pawlin palik an ko ih Stepan cu an kai, thu an suhnak ah a thilsual tuah mi cu a phuangaw ih “Thikthu siatnak ruangah a si” a ti. Court in tualthat thubuai a orhter ih kum 18 sung thawngtla dingin a thu an ṭhencat. Russia ramsung ah nunau tam sawn cu an pasal / koppi pawlin an vel ṭheu, kut an thlak ṭheu.
Leave a Reply