An Pu In Hnaṭuan A Ban Ruangah A That

Singapore ram ih hnaṭuan Malaysia tlangval in an pu a that. March 11, 2019 kum ih thilthleng a si ih June 9, 2021 ah court in thuṭhennak felfai an nei, an pu thattu tlangval kum 24 mi Yee Jing Man cu kum 20 sung thawngtla dingin a thu an ṭhencat.

A fala in an hnaṭuannak Jiji company ih hnaṭuan dingin a dilsak hnuah March 2017 ihsin hna a ṭuan, a hnaṭuan a ṭha ih a fel zet ruangah 2018 kum China kumthar ni ah laksawng ‘angpau’ ah SGD999 zat an pe. Cun a hnaṭuan khal an khaisang.

September 2018 ihsin bulpak thinharnak aneih ruangah hna a ṭuan ṭha nawn lo. Ni reipi sung tla hnaṭuan loin aum ṭheu, Yee Jing Man in hnaṭuan a ning deuhdeuh ih bulpak thinharnak aneih thawn amah le mah tla a thataw tum lawk.

Cutin, hnaṭuan a cawlh cingcing ruangah an pu Mr Lin in a fala hnenah ‘Hitin hnaṭuan a cawlh ringring asilen hnaṭuannak ihsin ka ban ding’ a ti. A fala in a sim thei ih a thinhar cia thawn an pu cu that a tum, asinan a thinhennak cu ti dai tum in thlakhat sung inn sungah a kharhkhum aw.

Inn sungah aum ringring ih mobile games lek in caan a hmanglian. March 1, 2019 ah hna ava ṭuansal ih an pule khalin an rak cohlang, asinan ni 6-nak March 6 ihsin hnaṭuan a cawl lala.

March 11 ah an pu in hnaṭuannak ihsin a ban thu a fala hnenah arak sim, hnaṭuan an ban ti a theih veten a sun ah ava feh hngal ih an pu Mr Lin cu a that. A office ah a lutchilh ih a hngawng ah nam in a at, hnaṭuan hotu 2 khal nam in a dawt ih hliam nazet an tuar. Hnaṭuan hotu 2 cu siizung ih an tuamhlawm hnuah damten an suak theisal.

Yee Jing Man in “Lamzin dang ka nei nawn lo” a ti. Palik pawlin an kai ih thinharnak aneih ruangah thu a ruat sau thei lo si ding ti zumnak an nei, cutin tualthat thubuai orhter ih kum 20 sung thawng a tla ding.

Be the first to comment

Leave a Reply

Your email address will not be published.


*