An Restaurant Ah Ralbawi Fapa Rawl Ava Ei Ih An Sualaw Ciamco, Hotel Neitu Le Hnaṭuantu Pawl An Kai Thluh

Nay Pyi Taw, Excellent Restaurant ah ralbawi fapa le a rualpi pawl rawl an va ei, June 7 zanah rawl an va ei ih an nuamaw zet. Ralbawi fapa ih hmin cu Sithu Htut a si ih a pa cu Home Affairs Minister Lieutenant General Soe Htut a si.

General Soe Htut cu Min Aung Hlaing ih rualpi ṭha a si ih a lal zet, Sithu Htut cu a fapa pathum lakih nautabik a si ih Construction le Tourism Companies tampi anei zo. A rualpi pawl thawn Excellent Restaurant ah an va lut ih ralbawi fapa a si ti an rak thei lo.

Cabuai pakhat ah nunau 3 thawn an totlang ih an kiangih rak to tlangval 3 in a topi fala pawl cu an rak ter rero ruangah ralbawi fapa cu a thinheng.

Ralbawi fapa in palang le khuat in a deng ciamco ih tlangval 2 cu an tlansuak hngal, pakhat cu a dum ih hotel coka sungah a vel ciamco. Hnaṭuantu pawlin an va ṭhen ih kut arak thlak ruangah an buai thok.

Sithu Htut ih rualpi pawlin an va bawm ih hnaṭuantu pawl thawn an sualaw ciamco. A rualpi pakhat in phone call a biak hnuah ralkap/palik motor 20 in Excellent Restaurant cu an ra kulh thluh ih zohman lut/suak an siang lo.

Vengsung mi pakhat in ‘ralkap uniform hruh loin hlaral ihsin ralbawi fapa Sithu Htut cu an rak kil ringring zo’ a ti. Restaurant neitu khal ava thleng cih ih hnaṭuantu pawlin “Minister fapa a si ti kan rak theih lo ruangah a si” an ti.

Ralkap in restaurant neitu le hnaṭuantu pawl cu an kai thluh. June 8 zanah restaurant ih hnaṭuan nunau 17 le coka ih an velhmi tlangval cu an suahsal. Asinan restaurant neitu, a nupi le an fate nauhak lai 2 le hnaṭuantu 15 cu an kai lai.

An thuhla buaipitu an lawyer khalin an va tong thei hrih lo. Vengsung mi pakhat in “Khami zan ah nasa zetin an buai, a cemnak ah ralkap thuhla a si. Tu’ahcun nulepa ralkap sinak sangin lai an rel rero thlang” a ti.

Be the first to comment

Leave a Reply

Your email address will not be published.


*