An Urthat Mi Kinma Pitar Le Putar Hrang Thlahnak Caanserh An Tuah Thei Hrih Lo

June 15, 2021 ah ralkap in Magway Division, Kinma khuasen ih inn zaten an urkang thluh ih an khua cu vutcam ah a cang. Khuasung mipi pawl cu sahimnak hawlin ramlak ah an rak tlanlut man.

Tlansuak ve thei lo putar le pitar U Mya Maung (kum 85) le Daw Kyi Hmein (kum 83) cu inn ah an rak um ih ralkap pawlin an inn thawn an ur that. U Mya Maung cu a damlo ruangah lam a leng thei lo, ihkhun ah a it ringring.

A nupi Daw Kyi Hmein khal a keruh a kiak zo ih áš­haten a vaksuak thei lo. An tupa in “Ka pi ih ke cu kan tuamhlawm rero lai ih muang teten cun a feh thei. Inn cu lenglam ihsin kan kalh lo, ka pi in ka pu damlo a tlansan thei lo a si bik. Ka pi ruhro cu ka pu kiangah arak um lo, ka pu kang rero cu meisa a mit tumnak ah a kang that ve a si ding” a ti.

Daw Kyi Hmein in a pasal le an inn kang rero cu tidai thawn thelhmit tum in tidai a khai ti an tikhur ih a thil ret mi ihsin an theithei, asinan pitar damcak lo a si ruangah thelhmit thei loin a duhdawtmi a pasal kiangah mual a liam ve.

An ruhro pawl cu an la ih an urkang zo, asinan an sakhua dan vekin thlahnak caanserh cu an nei thei hrih lo. An khua kiangkap ah ralkap pawl an hrang tuk lai ruangah zianghman an tuah thei hrih lo.

Khuasung mi pakhat in “Ka pilepu vuinak caanserh zianghman kan tuah thei hrih lo, boruak khal a dai hrih lo. Ramlak ih tlan khuasung mi pawl khal an ra kir ngam hrih lo. Ziang tikah ralkap pawl an rasal ding, an ra urkang sal ding ti an phang ruangah khua ah an kir ngam hrih lo” a ti.

Be the first to comment

Leave a Reply

Your email address will not be published.


*