An Zawhte An Urkang Hnuah Ara Tlungsal

England, Warrington, Cheshire khua ih um innsang khat in zawhte an vulh ih an duhdawt zet, a hmin ah Frankie tin an ko. An fale 2 an nauhak lai ihsin zawhte cu an vulh zo, an fapa Remy ih rualpi ṭha bik khal a si, ihkhun khat ah an ittlang ringring.

May 19 sun ihsin an zawhte cu a hlo thutthi, vengsung ah an hawl rero nan an hmu thei nawn lo. Cumi hnuah an innkiang lamzin parah motor ih rial that mi zawhte thi an hmu, runsuaktu pawl hnenah an zawhte zuk an va hmuh ih an zawhte thawn an bangaw ciahciah an rak ti.

Rachel Fitzsimons tei innsang in zawhte thi cu an zohfiah nawn lo, a san cu motor in a rialnak ah a sa a darh thluh ih rim anei zo. An fanu kum 10 mi Thea le kum 7 mi Remy cu zawhte zunngai in an ṭap rero, siang lo cingten an zawhte ruang cu an urkang ih an innsang zaten an ṭap thluh.

A vutcam cu an fapa Remy in a ihkhun kiangah a ret. Ni 22 hnu June 10 sun ah an zawhte Frankie cu ara tlungsal, an innkot ah ara Meow cu mak an ti tuk. An zohfiah ih an zawhte ngai a si ti an theifiang, asinan arak tawl tuk zo ih siizung ah an tlanpi hngal, sibawi pawlin damlonak anei lo an rak ti.

An fate 2 khal um ngaihnak thei loin zawhte cu an pom ciamco, an rak urkang mi zawhte cu zoi zawhte a si ti an thei hrih lo. A vutcam cu ziangtin an tuah ding ti an tawlrel rero lai, an zawhte Frankie cu khuitawk ah arak feh, ziangtin a hlo ti cu an thei lo. An zawhte an hmuhsal ruangah lungawi aipuang in an innsang zaten an hni theisal.

Be the first to comment

Leave a Reply

Your email address will not be published.


*