Aung San Suu Kyi Le A Upa Ih An Cuhawk Mi Inn Cu Ralhrang Thuṭhentu In A Upa Hnenah An Pe

Yangon, University Avenue Street ih um hmuan number (54) sungih um innpi cu Aung San Suu Kyi (kum 77) le a upa Aung San Oo (kum 79) in an cuh aw. Myanmar zalennak rak sualtu Aung San ih nupi Daw Khin Kyi ih hmuan a si. An fa pahnih Aung San Suu Kyi le a upa lawng an damlai.

Hmuan sungih um inn pakhat cu 2000 kum ah a hrek veve zem aw dingin taza an cuai aw ih 2016 kum ah a hrek veve zem aw dingin thuṭhennak an nei. Hmuan sungih um inn pakhat khal hringtu nu Daw Khin Kyi in a damlai ah a tupa U Khin Maung Aye hnenah a pe, cahnah poimawh pawl thawn ro thilri ah a pe.

Aung San Oo in hmuan sungih um zaten a co thluh duh ruangah 2018 kum ah thubuai a thehlut nan Nay Pyi Daw thuṭhennak zung in a cohlang lo, a hngawng. Ralhrang in ramsung thuneihnak an lak hnu 2022 ah Aung San Oo in hmuan number (54) sungih um innpi thuhla cu thuṭhennak zung ah a thehlut sal ih August 22, 2022 sun ah thuṭhennak zung in nehnak an coter.

Hmuan number (54) sungih um innpi cu Aung San Oo kutsung ah an hlan ih a duhdan in a tawlrel ding. Aung San Oo cu ramdang mi sinak a neih ruangah Myanmar ramsung ah ro a co thei lo tin mi ṭhenkhat in an ral. Asinan, thuṭhennak zung in ‘A dik lo, Myanmar daan le dun ah ramsung ih piang, Buddhism nulepa pahnih karlakih hringmi fa cu ramdng mi sinak an nei asikhallen ramsung ah ro an co thei thotho” an ti.

Hmuan number (54) sungih um innpi thuhla an rel laiah Aung San Suu Kyi aum lo ih a thei lo. Kaphnih lawyer pawl lawng an um. A hlan ah Aung San Suu Kyi in himi hmuan le innpi cu zuar a tum lo ih san thuanthu theih ringringnak ah Museum vekin a tuah tum pawl cu ramdang palai hnenah a sim thei.

Asinan, a upa Aung San Oo in, “Leitlun ah himi innpi vek inn tampi aum. San thuanthu thawn pehtlaihnak zianghman aum lo” a ti. Aung San Oo in an innpi cu lilamnak in a zuar tum ih ralhrang pawlin lei ding an tawlrel rero lai tin FM – Mandalay thuthang sungah an tarlang.

Be the first to comment

Leave a Reply

Your email address will not be published.


*