Aungbali £7 Million Lenglo A Poh Ngah, Asinan Arak Thi Man

Scotland, Glasgow khua ih um pacang kum 59 mi Andrew in aungbali a lei ih a poh ngah nan amah in a poh ngah le ngah lo khal a theithei nawn lo. Andrew cu vanduai thlak zetin an kaiten ihsin a tla sual ih a hngawng ruh a siatsuah aw.

Siizung ah caan reipi sung an tuamhlawm ih ṭhah lam pan thei nawn loin a thi. A thih hlante ah a aungbali leimi ticket cu a fanu hnenah a kuat, a fanu kum 32 mi Lisa in a pa a thih hnuah a pai pekmi aungbali cu a zohdik sak ih £7.9 million a poh ngah ti a thei.

Lisa in, “Aungbali a poh ngah ti ka theih veten ka riahsia tuk, aungbali a poh ngah thu ka sim cak tuk nan amah aum nawn si lo. A aungbali poh ngahmi a cen thei lo cu ka riahsia tuk, aungbali a lei pekte ahcun ka ral hnihsan ciamco ih ‘Ka poh ngah tikah cun na hni nawn lo ding’ in rak ti.

“Ka pa, na rak ṭong dik tuk. Aungbali na poh ngah ih ka hni thei lo, ka ṭap sawn sokhaw” a ti. A aungbali poh ngahmi cu a fanu tei innsang in an va lasuak ih a pai tumtahmi vekin an hmang tum thu media hnenah a sim thei.

Be the first to comment

Leave a Reply

Your email address will not be published.


*