Aungbali A Poh Ngah Ih A Lungawi Tuk, A Rualpi Pawl Thawn Lawmnak An Tuah Ih A Thi

Thailand, Nonthaburi khua ih um kum 56 mi in aungbali a poh ngah thu a theih veten a lungawi tuk. A aungbali number cu 417 a si, aungbali a poh ngah ti a theih veten a rualpi 5 thawn lawmnak an va tuah. Rawldawr ah zu an in ih an nuam aw zet.

Zan nazi 7:00 hrawngah nasa zetin ruah a sur ih zu an in vivo. Cumi hnuah a tlung, a rualpi pawlin tluangten inn a thleng ah an ruat. Amah hi thilri zem ih hnaṭuan ṭheu a si. A tlung har tuk ruangah a farnu in a phone rero nan phone a kai thei lo.

Rawldawr ah a farnu cu ava feh ih a rualpi pawl cu an rak um lai, an mangbang tuk, a tlunnak a rei tuk zo an rak ti. A rualpi pawlin an hawl bawm, an inn fehnak lamzin tluan ah an hawl ih lamzin kap khur kiangah a kedam pakhat an hmu.

Khur sungah an hawl ih thicia in an hmu, khur sungah arak tla that. Palik pawlin an zingzoi ih a taksa parah vuakvelhnak hliamhma zianghman aum lo, mi kuttuar a si lo ih cansualnak a si an ti. A aungbali poh ngah mi cu a cen man lo.