Australia Fala Cu Inn Par Ihsin A Tla, Zianghman Thei Lo In Siizung Ah A Um, A Pasal Si Mai Ding A Tlangval In Arak Phatsan

Australia, Perth khuami fala kum 25 mi Brie cu US, Canada ram ah hnaṭuan in aum. Cutawk ah duhdawt zetmi tlangval anei, a tlangval thawn hamawknak an tuah zo. August 2020 ah vanduai thlak zetin inn par ihsin a tla, a luruh a kuai ih a thluak sungah thisen a lut.

A taksa cu nasa zetin a siatsuat aw ih zianghman a thei nawn lo, siizung ah an tlanpi ih siibawi pawlin 10% lawngin a damkhua suak ding ti an zum. Australia ram ih um a nulepa khal siibawi pawlin an ko ih an fanu cu mangṭha ta dingin an fial, asinan Covid-19 ruangah a nulepa in an va vehvai thei lo, cozah in vahsuah an siang lo.

A rualpi pawlin siizung ah an umpi ih video call ihsin a nulepa in an zoh ṭheu. A tlangval thawn kum 4 sung an kopaw zo ih neihawk tum an si. Thla 5 hnuah mangbangza in a harhsal, a lungfim veten a duhdawt zetmi a tlangval cu a hlam.

Asinan, a rualpi pawlin arak phatsan thu an sim thei, fala dang thawn hmun dangah an tlan ti a thei. A tlangval in a pehtlaih duh nawn lo ih an pehtlaih awknak thil ziangkim cu a satcat thluh (a block). Siizung aum sung khalah a tlangval in veikhat hman arak vehvai lo ti a thei cu a lungkuai. Tu’ahcun a dam ṭha deuh zo ih an ram Australia ah a tlung, hnakum ihsin hnaṭuan theisal a beisei.

Brie in, “Kum 4 sung kan kopawk hnuah kan damlo laiah in rak phatsan cu ka mangbang tuk, ka thin a naa. Ka samhrisih a si ding tin ka rak zum nan ka zumsual a si. Zohman ka zum thei nawn lo, duhdawtnak lawng siloin minung pehtlaih awknak hi ka zum thei nawn lo. Ka damlo lai ih in rak umpi ringringtu ka rualpi pawl parah ka lungawi tuk” a ti.

Be the first to comment

Leave a Reply

Your email address will not be published.


*