Awngbali Tampi A Poh Ngah Ih Sumpai A Lak Suah Hlanah Tiva Ah A Fen That

US, Michigan, Caseville khua ih um mipa kum 57 mi Gregory Jarvis in awngbali a poh ngah ih ava lak suah hlanah tiva ah a fen that, a zalte sungah a awngbali ticket khal aum lai.

September 13, 2021 ah Gregory Jarvis cu Blue Water tiva kap ah aum ih a nuamaw zet. Tiva kap ah a lek ṭheu ih lawng a mawng ṭheu, kiangkap mipi pawl khalin miṭha zet a si tin an ngaina tuk. Awngbali a lei ih an hnaṭuannak ah awngbali poh ngahtu an um thu an rel celcel.

Mi pakhat in “Na ticket kha zoh hnik aw” a tiih an vun zoh cu arak poh ngah ngaingai. A lungawi tuk ih an hlim zet, awngbali cu $45,000 zat a poh ngah. Asinan a awngbali poh ngahmi sumpai cu a lak suak lohli thei lo, a Social Security card a siat zo ruangah sumpai cu a lak suak thei lo ih a thar a tuahter lai.

Michigan Lottery Commission daan le dun ah $600 aitam awngbali an poh ngah asilen an ID le Social Security card thawn an la suak ding timi aum. Cutin Social Security card thar a tuahter lai ih hmailam caan suangtuahnak thawn aum. A rualpa in “Sumpai a lak suah hnuah North Carolina ah feh in a pa le a farnu a tong tum thu in sim” a ti.

Cumi hnu ihsin a hlo, a hnaṭuannak ih a lang dah lo ruangah an pule pawlin mak an ti tuk, an phone rero nan a kai thei lo. Tlawngkai ninga sun ah tiva kap ah mithi ruak an hmu ih an va zohdik cu Gregory Jarvis ih ruak a si, a zalte sungah a awngbali ticket khal arak um lai.

Police pawlin an zingzoi vivo ih “Misual cangvaihnak zianghman aum lo, a lawng parah a kai tum ih a tlasual. A lu a khawgaw ngah ruangah tidai sungah a thi” tin an phuang. A awngbali poh ngah mi cu a sungkhat hnenah an hlan. (#New York Post)

Be the first to comment

Leave a Reply

Your email address will not be published.


*