Bank A Suam Tum Ih A Kut Ngan A Sia Tuk Ruangah A Hlawhsam

Kut ngan sia tuk cu thilsual an tuah ding khalah an hlawhsam ṭheu. England pacang kum 67 mi Alan Slattery in bank suam a tum ih a kut ngan a sia tuk ruangah a hlawhsam.

A bank suam tumdan cu a danglam zet, midang tuahmawh a duh lo ruangah bank sungah ava lut ih sumpai kiltu hnenah cahnah a pe.

Kiangkap ah minung an tamtuk ruangah zianghman a ṭongsuak lo ih cahnah lawng a pe, cahnah ahcun “Nan screen pawl khalin ka thil kengmi hi an kham thei lo ding. 10s le 20s pawl in pe uh, midang customers pawl khi ruat phah uh” tin a ngan.

A rel tummi cu ‘Meithal ka kengih in kham thei lo ding, nan sumpai pawl in pe lohli uh. Midang mikhual pawl khi tuahmawh nan duh lo asilen daiten um uh” ti a si.

Nationwide Building Society ih sumpai kiltu in a nganca cu a siar thiam lo ruangah suam an tong ti khal an theiaw lo, Alan Slattery khal a mangbang tuk ih kut lawngin a suaksal. Cumi hnuah London Road, St Leonards ah a lut ih cahnah cu ava pe.

Cutawk ih sumpai kiltu in arak theithiam ih a ṭih tuk ruangah £2,400 zat arak pe. A tlan hnuah palik pawl a ko lohli ih CCTV ihsin an zingzo nan an kai ngah lo. NatWest bank ah a lutsal ih a cahnah cu a pe lala.

Asinan cutawk ih hnaṭuantu pawlin an rak ṭih lo ih kut lawngin a tlansuak. Hnaṭuantu pawlin palik pawl an ko lohli ih lamzin ah an kai ngah. Palik pawlin bank suam thubuai an orhter ih kum 6 sung thawngtla dingin a thu an ṭhencat.

Be the first to comment

Leave a Reply

Your email address will not be published.


*