Bawipa’n A Lo Tuahsak Dingmi Zoh Men Uh: Dr. S. Ṭha Nei Fai

(Exo.14:13-14) Israel pawl tipi senkap ih an dinhmun le tulai kan dinhmun hi a bangaw ciah. An hmailam ah peng 13 kaumi tipisen, dunglam ah Faro ralkap rual, an dinhmun a va khirhkhan em! Kan nih khal dunglam, hmailam in Kawl ralkap le Covid 19 in in kulh ve a si hi!

(1) Daite’n um phot uh: Bawipaih canghvaih le tongsuah hngak hrih dingin Moses in a sim hai. Minung hi thinpit beidon tuk can ah tong tumlo pipi tong suak ih tuah tumlo pipi tuahsuak kan hmang. Unau! tuar tento hrih uhsi, hngak tento hrih uh si. Kan cangsual pang ding phan a um.

(2) Bawipai’ Rundamnak Kutcak: Israel pawl cu Pathian in hnamdang pawl hmangin nun a sim, nun a zirh theu. Tap le aihram ih an kawh tikah ummen thei lovin Othniel (Thuthentu 3:7-12), Ehud (Thut.3:12-30); Shamgar (Thut.3:31); Deborah le Barak (Thut. 4 & 5); Gideon (Thut.6 -8); Abimelek (Thut. 9); Jepthah (10-12); Samson (Thut.13-16) pawl hmangin a runsuak sal.

Kannih teh in runsuaktu ding ah zopawl tak hmang kei ci maw? UN maw Asian mi maw a hman ding, kan thei banlo. In runsuak tengteng ding a simai. Amah lawngte kan manhlap tuk pangle kan caangsual ding.

Tlai dahlo Pathian, pelh dahlo Pathian, mibum dahlo Pathian, hngilh neilo, hmang dahlo Pathian kan nei. Ni 4 hnu ah thleng hmansehla Lazaras hrangah a tlailo. A cante ah a thlengih A SUNLAWINAK KUTCAK a langter…’Hallelujah.

(3) Faro ralkap an thi theh: (Exo.14:27) Egypt ralkap cu ziangtluk in tam khal haisehla, ziang bangin cak khal haisehla kan Pathian hrangah reltlak an silo. A cangvaih an cemral verver, viarviar thluh. Amen, Amen. Tipisen in a hnuukliam, a dolhhlo, a thehdarh, a hnimhlo theh mai.

(4) Tipisen raalah: Israel pawl ih cuanmi, hngahmi le thlirmi BAWIPAI’ KUTCAK ih a hruai cun tipisen raalkhat an kai thluh. Nauhak aate, pitar putar, mibanglote khal an luat theh. Pakhatte hman luatlo an umlo. An lungawituk ah Moses ih Zion Hlapi an sak durdo (Exo.15:1-18); profet Miriam le Israel nubupawl in khuangte thawn an aih, an lawm, an laam ( Exo.15:19-20).

Rinsan tlak bik, biak manhlaa bik, hngah, beisei le kawhman um bik JEHOVAH PATHIAN cu kan Pa, kan Bawi, Kan Pathian a si. Ka duhdawtmi Pathian Fahniang rual!

Ṭap nawnhlah uh, beidong le thinnau in um nawnhlah uh, Zion khua a vaang dingih, Nan tahnak cu Laamnak ah, Nan aihramnak cu Hnihnak ah; Nan lungsiatnak cu Lungawinakah, Nan sunral cu hlawknak ah kan biak Cung Pathian in in thlenghsak theh ding.

Bawipa’n Amipawl cu Faro ralkap ih dawi a siang nan an tuahmawh a sianglo, Jacob kha Laban ih dawi a siang nan kut a thlak a sianglo. Daniel pawpi thawngih thlak cu a siang nan an keu cu a sianglo.

Shadrak, Meshag le Abednago kha meipi sung hlon cu a siang nan meipi kangh cu a siang hrimhrim lo. Meipi rim an nam hman a duh lo. Tah le aihram ringring, beidong thinnau ih cauh ringring, harsa mangbang ih vahvaih ringring cu kan Pa le kan Pathian in in siang lamlam lo. Thinfual, lainatnak ih khat, zangfah thinpemnak ngah, ngilnei, zaidam, thinfual le nunnem Bawipa a si. Bawipa’n nan kaa ah hnihnak, nan thinlung ah lungawinak ret thlang hram seh.

Be the first to comment

Leave a Reply

Your email address will not be published.


*