Bazar Ih A Thilzuar Lai An Va Kai Ih A Thaisun Ah “A Ruak Ra La Uh” An Ti

Bago, Htantabin Township, Nat khua ih um tlangval kum 27 mi Ko Ye Naing Aung cu ralkap pawlin an kai ih a thaisun ah a thih thu theih a si. An kaihnak san cu November 8, 2021 ah an khuasung ih um ralkap zung ah bomb a puak, cumi hnu nazi hrek hrawngah Ko Ye Naing Aung cu bomb puahtu ih an rinhlel ruangah bazar ah an va kai.

Bazar ah cet thilri dawr le Mohinga, rawldawr pawl an ong ih cutawk ah an kai. Ralkap, palik le dalan pawlin an kai ih Htantabin ralkap sakhan ah an hruai ih a thaisun November 9 simlam ah a innsang pawl hnenah “A ruak ra la uh” tin an theihter.

An sungkhat in “Bazar ah an ra kai top, bomb puak thuhla ti lo ahcun thudang zianghman aum lo. Kan naupa hi ziangvak cangvaihnak khalah a tello, malte zu a in ṭheu. Vengsung hnatlang le mithi ruak vuinak tivek ah hnaṭuan ava bawm ṭheu, mi thawn khal an tibuai aw dah lo” a ti.

Ko Ye Naing Aung hi Myanmar ramsung a buai pekte ah lamzawhnak ah arak tel lawk, tuiṭum ih bomb puak thuhla ah amah lawng an kai tin vengsung mi pakhat in media hnenah a sim thei. An kaih sun ah a innsang pawlin ralkap sakhan ah an va tong tum nan ralkap pawlin an rak siang lo.

November 9 zan ah a innsang pawlin a ruak an va la ih an phum hngal, Ko Ye Naing Aung hi unau thum an si ih amah lawngin nupi anei hrih lo. Ralkap in thuneihnak an lak hnuah mi ṭhenkhat cu an kai ih thusutnak hmunpi ah an thi hngal, ṭhenkhat ruak cu an innsang pawlin an la thei ih ṭhenkhat cu an ruak khal hmuh ding aum nawn lo.

AAPP in ralkap pawl ih an kaihmi 66 cu an kaih hnu nazi 24 sungah an thi hngal tin August thla ahkhan an rak phuang. Media pawlin Ko Ye Naing Aung ih thuhla le a thihdan pawl cu theifiang tum in Htantabin ralkap sakhan cu an phone nan ralbawi in zianghman arak sim duh lo.

Be the first to comment

Leave a Reply

Your email address will not be published.


*