Benjamin Sum In Chin Person Of The Year Laksawng A Ngah

Kum 20 mi Benjamin Sum cu 2019-2021 ih zohthimtlak bik Chin Person Of The Year laksawng pek a si. Chin Pawlpi USA president Pu Siang Luai Mang in “A liamcia mi kum 2 sungih a nun lamtluan ah taima suah ih a zuamnak le a hlawhtlinnak zoh tikah mi cungcuang zohthim tlak a sinak siseh, a miphun parih duhdawtnak le zawnruahnak a neihmi parah siseh, thiltha a tuahmi parah siseh, Chin Pawlpi USA in kan sunloih ih 2021 zohthim tlakbik cu Benjamin Van Nei Sum hnenah hlan a si,” tin a phuang.

USA ih um a unaupa in laksawng cu arak laksak. Benjamin Sum in “Ziangtik lai caan khal Pathian a ṭha, zianghman ka si lo. Pathian cu ziangkim a si, Pathian ih zangfahnak zarah 2019-2021 Chin Person Of The Year laksawng ka ngah. Himi laksawng cu ka Pu Sa Tin Sum le ka pa Pa Lal Hmuak Lian hnenah ka hlan.

Ka pi, ka nu, ka nute le thazang in petu nan zaten parah ka lungawi tuk. Bawipa ka lungawi, zianghman ka si lo. Pathian cu ziangkim a si” tin a facebook cahmai ah a tarlang. Cun laksawng an peknak khalah cakuat in lungawithu a hei sim “Lungawithu simnak, ahmaisabik ah sunmang hman ih ka rak man dah lomi 2021 zohthim tlakbik “Person Of The Year” laksawng ngah thei dingih damcahnak in petu Pathian hmin ka thangthat.

A tawlreltu Chin pawlpi USA tlun ah ka lungawi ngaingai. Hi dinhmun thleng thei dingin kan sentet lai in i kilkhawi, nun simtu ka pi, ka nu, ka ni le ka sungkhat unau zate tlun ah simcawk lo lungawinak ka nei. Ka hrang ṭhabik ding lamzin ah thinsau zet ih i zirh, in kilkhawitu ka saya zaten parah ka lungawi.

Thlacamnak thawn in dinpi ringringtu thlarau lamih ka unau nulepa zaten tlun ah ka lung a awi. Ziangtik lai caan khalih in dinpitu ka mipi nan zate tlun ah ka lungawi. Nan zaten ka lo duhdawt. A netabiknak ah himi laksawng ka ngahmi cu mual in liamsan zotu ka pu Pu Sa Tin Sum le ka pa Pa Lal Hmuak Lian hrangah ka hlan a si. Simcawk lo lungawinak thawn Benjamin Sum. Pathian thlawsuah nan zate tlun ah um hramseh” a ti.

Be the first to comment

Leave a Reply

Your email address will not be published.


*