Bomb An Test-nak PDF Pakhat A Thi, A Nupi Cu CDM Tuah Tlawng Sayama A Si

Mipi humhimtu pawlin ralthuam an nei ṭha lo ruangah nunnak liam an tam zet zo. Ayeyarwady peng, Kyangin ramsung ih um PDF ralkap Htet Wai Yan Lin cu April 11 simlam nazi 7:00 hrawngah tuahcop bomb an test ih a puaksual ruangah a nunnak a liam.

Kum 25 mi Ko Htet Wai Yan Lin cu ralhrang in thuneihnak an lak pekte ah nasa zetin lamzawhnak ah a cangvai, ralhrang pawlin kaih an tum ruangah a tlan ih tualsung PDF ah a lut.

Ayeyarwady-PDF ṭuanvo neitu in, “Mizan ah bomb an test-nak cansualnak a tong ih a nunnak a liam. Dothlennak ah huaisen zet ih thudik dinpitu a si ih cawimawi upatnak kan hlan” a ti. Htet Wai Yan Lin cu PDF a lut hnuah ralhrang pawl donak ah a tel rero zo, a nupi cu CDM tuah tlawng sayama a si.

PDF ṭuanvo neitu in, “Ko Htet Wai Yan Lin cu zalennak sualtu a si vekin a nupi khal CDM tuah tlawng sayama a si, fanu kum 3 mi an nei. A nupi in CDM a tuah ruangah sumpai laklutnak an nei nawn lo, curuangah a nupi cu sumpai hawl dingin Singapore ram ah a feh.

A fanu cu a tanta, Singapore ram ah a nupi hna a ṭuan rero laiah mual a liamsan, a tantami a innsang pawl thawn kan riah a sia tuk” a ti. Ko Htet Wai Yan Lin ih ruang cu tuisun April 12, 2022 sun nazi 12:30 ah ramlak hmun pakhat ah an vuiliam

Be the first to comment

Leave a Reply

Your email address will not be published.


*