Bomb Puak Ruangah Nauhak 3 An Thi

Myanmar ramsung buainak ah bomb puak thuhla hi theih ding a tam zet zo ruangah vahsuah tikah ralring a ṭul tuk. Magway Division, Pakokku District, Mya Thida tili kap ah bomb a puak ih nauhak 3 an thi, pakhat khal hliamhma nazet a tuar ih siizung ah an tuamhlawm rero lai.

Tualsung mi pakhat in, “November 27, 2021 zanlam nazi 5 luan nazi 6:00 hrawngah bomb a puak, Bomb puaknak hmun hi mipi tamnak hmun ah a si, mipi cawlh hadamnak hmun a si. Hnawmbawm kiangah bomb a puak” a ti.

Bomb puak ruangah hnawmbawm sungih bursia hawl rero lai nauhak kum 7 mi Maung Nyein Thar Aung, kum 12 mi Maung Aung Htike cu hnuailam taksa tan in a hmun ah an thi. Hnawmbawm kiang tokhan parih to nauhak pahnih khal hliamhma nazet an tuar ih siizung an thlen hnuah pakhat a thi.

Kiangkap um in, “Tokham parih to Mazin Nwe Aung le Ma Kyaw Kay Khaing khal bomb puak ruangah hliamhma nazet an tuar. Mazin Nwe Aung cu siizung an thlen hnuah a hnukcat, mibawmtu pawlin hliamtuar pawl hi siizung ah an tlanpi. Tokham parih to nauhak pahnih ih nulepa cu meisa cetzung ih hnaṭuantu an si.

Mual liamtu nauhak pathum pawl hi nun harsa zet hlir an si, hitin mipi tamnak hmun ah bomb a puak cu kan thin a nuam lo zet” a ti. November 24 khalah Sagaing Region, Monywa tlawnginn kiangah bomb a puak ih nauhak kum 10 hnuailam pathum an thi tin Voice of Myanmar thuthang sungah an tarlang.

Be the first to comment

Leave a Reply

Your email address will not be published.


*