Brad Pitt In A Nupi Hlun Taza A Cuai

Brad Pitt (kum 58) le a nupi hlun Angelina Jolie (kum 46) cu zuknung khawvel ah an hlawhtling zet ih an hminthang tuk, asinan an innsang thuhla ahcun buainak in a khat. Innsang an din thok dan khal a ṭha lemlo, 2004 kum ah ‘Mr and Mrs Smith’ timi zuknung an cang ih cutawk ah Brad Pitt cu nupi nei lai a si.

A nupi khal lemcan thiam hminthang Jennifer Aniston a si. cutin nupi nei lai cingin Brad Pitt le Angelina Jolie cu an duhaw. Brad Pitt in a nupi cu a ṭhenaw ih a fala thar Angelina thawn an neiaw, fate 6 an nei ih 3 cu midang fa an lakmi a si.

An innsang ah buainak phunphun an ton ruangah 2016 kum ah an ṭhenaw, an ṭhenawk hnu khalah buainak in a thlun vivo. An fale pawl an cuhawknak ah court ah an feh ringring, tu’khalah Brad Pitt in a nupi hlun cu taza a cuai.

Taza a cuainak a san cu an neihawk laiah France ram ah zu mankhung pawl tuahnak an lei ih zu man cu an zemaw. Cumi an zu tuahnak cu Angelina in a pasal hlun theih loin Russian businessman hnenah arak zuarsuak.

Himi an zu tuahnak ah Angelina in 40 percent in covo a nei ve ih 2008 kum ah an pahnih lungkimnak tello cun zuar lo dingin hmin an khen zo. Brad Pitt in, “Ka lungkimnak tello, ka theihnak tello in arak zuar” a ti. Angelina khalin amai covo lawng a zuar thu a rel ve ih an thuhla cu court in a buaipi rero lai.

Be the first to comment

Leave a Reply

Your email address will not be published.


*