Brazil President Hi A Nauhak Lai Ahcun Lamzin Kap Minung A Si, A Thilton

Kum 90 mi Fernando Henrique Cardoso hi Brazil president hlun a si ih mipi in an duhdawt zet. 1995-2003 tiang an rampi a kaihruai. A nauhak lai 1940 kum ahcun Brazil ramsung ah milian le mifarah dinhmun hi arak thlau’aw tuk.

Fernando khal lamzinkap ah aum ih milian pawl ih boot a nawtfai ṭheu. Nikhat cu dawr cangkang zet hmaiah an to ih milian pawl ih boot nawtfai ding an hngak. Motor mankhung zet pawl ara dingih a sung ihsin milian hminthang pakhat ara ṭum.

Lamzinkap ih um nauhak pathum cu an va tlan ciamco ih “Ka pu, na boot kan rak nawtfai ding” tin an ngen ciamco. Milianpa cun zianghman a be lo ih amah kiltu pawlin nauhak pathum cu an dawitlan, milianpa cu dawr sungah ava lut ih thil ei ding hngakin capuai tokham ah a to.

Sangkate ihsin lamzinkap ih um nauhak pathum cu avun zoh ih an taksa tawntai zet cu a zoh ringring ih a lainat tuk ruangah dawr sung ihsin a suaksal. Nauhak pathum kiangah ava feh ih “Ziangzat so?” tin a sut, nauhak pathum cu an phur tuk ih “20” an rak ti.

Milianpa in, “A let 10 in ka lo pa ding, zoso nawtfaitu ding?” a tiih an zaten nawhfai dingin an cuhaw. Curuangah milianpa in pakhat hnu pakhat thu a sut, pakhatnak nauhak hnenah, “Ziangruangah na nawtfai duh?” a ti. Pakhatnak nauhak in, “Ka pu, zing ihsin hitawk hmun ah ka um zo ih tutiang zianghman ka ei hrih lo” a ti.

Pahnihnak a sutsal ih anih in, “Kei khal nikhat sung rawl ka ei hrih lo, inn ah ka nu len a damlo bese tuk” a ti. Nauhak pathumnak cu thu a sut ih, “Kei cu boot nawtfai man in pekmi hi ka rualpi pahnih hnenah ka pe ding” a ti. Milianpa in, “Aw! Rawl na ei zo maw?” tin a sutsal ih “Zing ah pawnghmuk phelhnih ka ei zo” a ti.

Milianpa in “Asilen nangmah sawt aw” tin a fial, cutin sumpai a pe ih dawr sungah ava lutsal. Sangkate ihsin milianpa in arak zoh ringring ih nauhak pathumnak cun a ngahmi sumpai cu a rualpi pahnih hnenah a zem lai cu a hmu.

Milianpa ih thinlung a neh tuk ruangah milianpa cu rawl a ei thluh hnuah nauhak pathumnak cu a ko ih hnaṭuan ding ṭha zet a pe. Cutin kum le caan an herliam vivo ih Brazil president arung ṭuan thei. {Midang zawnruahnak thinlung neitu cu khuanu in hlawhtlinnak a pe ṭheu, midang zawnruahnak thinlung neitu cu anmah in harsatnak tong khalsehla midang ih harsatnak hi an hmu hmaisa sawn ih an bawm hmaisa sawn ṭheu ruangah an hrangah midang an cangvai ve ṭheu}

Be the first to comment

Leave a Reply

Your email address will not be published.


*