C. Ronaldo In Nauhak Rualban Lo Ih Phone A Beng Kuai Sak

April 9, 2022 zan ah Manchester United le Everton bawlung an sit Everton in 1-0 in nehnak an co, Manchester bawlung sit thiam hminthang Cristiano Ronaldo cu a ke ah hliamhma a tuar ih a thisen a suak.

Bawlung sit an theh hnuah an suak ih nauhak kum 14 mi in a phone in arak zuk rero, C. Ronaldo ih ke hliamhma cu a zuk tum rero laiah C. Ronaldo in a phone cu a beng tlaksak ih a fehliam. C. Ronaldo ih cangvaihdan cu mipi in an dem zet ih palik pawlin a thuhla an zingzoi rero lai.

Nauhak nu in, “Ka fapa in Ronaldo hi a uar tuk, ‘Ronaldo a lek kem‘ ti in sut ringring. Kan hmai zawngah an ra feh ih a phone in arak zuk rero ih a beng tlak sak. Ka fapa hi rualbanlo a si ih a harhdamnak khal a ṭha lo, bawlung sit thiam mi ropi pakhat in ka fapa ih phone a beng tlak lai ka hmu cu ka riahsia tuk ruangah ka ṭap. Ronaldo khal pacang a si, a fale hnenah tuah ve sehla a duh zik lo” tin a riahsiat thu a rel.

Kum 37 mi Cristiano Ronaldo in Instagram parah ngaithiam dilnak ca a tarlang. “Thinlung lam buai laiah cun kan thilton hi control a har thei tuk, in ngaithiam uh. Mino hrangih zohthim tlak ih um ding kan si, tangdorten um ding kan si. Ka tuahmawh mi hnenah ngaithiam ka lo dil, Old Trafford leknak ah in ra zoh dingin ka sawm” tin a tarlang.

C. Ronaldo in ngaithiam a dil ih neta an leknak ah ra zoh dingin a sawm nan nauhak ih nu in, “Ka fapa hi rualbanlo te a si ih inn ka thlen hnuah a tuar naa tuk, bawlung sit zoh a tum nawn lo” a ti.

Be the first to comment

Leave a Reply

Your email address will not be published.


*