Cal-Kau, Cal-Ngolh Pawl Ih Danglam Hleicenak (6)

Mi ṭhenkhat in cal-kau, cal-ngolh cu thilmawi ah an ruat lo ih an zahpi ruangah an sam in an khuhthup ṭheu. Capoh khal an tuar caan aum, asinan cal-kau, cal-ngolh pawl hi micungcuang an rak si sawn. Hlanlai mifim mithiam, leitlun mifim pawl khal an cal a kau ih a ngolh deuh tlangpi (Tulai fimthiamnak a sang ruangah ṭhenkhat mifim kan theihmi pawl cu an cal ngolhnak ah sam an khoter). Awle, cal-kau, cal-ngolh pawl ih danglam hleicenak kan zohtlang ding.

(1) Amah le mah an rinsan aw: Cal-kau, cal-ngolh pawl hi anmah le anmah an rinsanaw zet. Midang zohman an rinsan lo ih anmah ke rori ih ding thei hi an zuammi bik a si. Mi kutke hnuai ah hnaṭuan an tum lo, an kutke hnuaiah mi hna an ṭuanter tum sawn. Harsatnak, buainak an tong tik khalah mi hnenah bawmnak an va dil dah lo ih anmahten an cinfel tum sawn.

(2) Awlsamten thu an thleng dah lo: Cal-kau, cal-ngolh pawl ih fala le tlangval ding khalah an duhum zet, a san cu mi an duh hnuhnu cu an thinlung hi awlsamten a thlengaw dah lo. Asinan, an duhlo hnuhnu cu ‘No Way’ a si ko, lamzin aum nawn lo.

Thil pakhat khat an tuah asilen hlawhtling hlanlo an tuah ṭheu, a karlakah tlaksiatnak, beidonnak thleng khalsehla an thiltuahmi cu thihchilh rori in an tuah thotho ruangah an hlawhtling duh zet. An thinlung khal a pacang ih an khuaruahnak khal a puitling zet.

(3) Zalen zet ih um an duh: Cal-kau, cal-ngolh pawl hi zalen zetin um an duh ṭheu. Anmai thu ih um an duh, midang ih thil fial tivek hi an ngaina zawng a si lo. Midang ih kaihremmi si hi an duh lo zet, midang an tibuai dah lo nan anmah hnaihnoktu pawl hi an dim cuang lo. Cal-kau, cal-ngolh fala tlang ih na nei asilen thil ti ding fial tamtuk lo awla nan duhawknak zalam a tluang ding.

(4) An thiam, fim hleice: Cal-kau, cal-ngolh pawl ih ziangkim ah an fim in an thiam hleice ṭheu. An thil ruatmi hi a ṭha thei zet, buainak khal awlsamten an cinfel thei. An thluak a ṭha si ko.

(5) An van a ṭha: Ziangkim an tuah, ṭuannak ah vanṭhanak cu an lamah a tang ṭheu. Harsa buainak ih an um tik khalah vanṭhannak cu an lamih a tang ruangah awlsamten harsa buainak ihsin an suaksal ṭheu.

(6) An nuncan ziaza a ṭha: An thluak a ṭha ih thu an ruat ṭha ṭheu ruangah an nuncan ziaza khal a ṭha ih rinsan an tlak zet. Midang ti thinheng / thinnatter ding hi an duh lo zet, midang va hnaihnok hi an tum dah lo ih hringnun hi zalen zet, tlaitluang zetin an hmangliam ṭheu.

Be the first to comment

Leave a Reply

Your email address will not be published.


*