Cambodia MP In, “Ralhrang Pawl Pehtlaih Ding Lawng Lamzin Umsun A Si, ASEAN Conference An Kai Thei” A Ti

Ralhrang mang bawi Min Aung Hlaing cu leitlun ramdang dang pawlin hremnak phunphun an pe rero lai. Asinan amah tantu ram khal an rak um vivo cu a buaithlak zet, China le Russia khalin an phatsan thei lo.

ASEAN sungṭuan Singapore, Malaysia le Indonesia ram pawl cun Myanmar ram thuhla ah rahrang pawl hi pehtlaih lo dingin thu an suah. Ralhrang pawlin ASEAN thusuak 5 an thlun lo ruangah ASEAN thawn pehtlaihaw hrih lo dingin thuthluknak an tuah.

ASEAN thusuak 5 cu ralhrang in sualnak nei lo an kaihmi pawl suah zalen sal ding, ramsung buainak cinfel lohli ding, hrilawknak felfai tuah dingih a nehtu hnenah ramsung thuneihnak pe ding… tipawl a si ih Min Aung Hlaing in a thlun lo ruangah meeting kai thei lo dingin hremak an rak pe zo.

Hnakum 2021 ASEAN Conference cu Cambodia ram ah an nei dingih Conference ṭuanvo cu Cambodia ram in a la ding. Cambodia MP Hun Sen in, “Ralkap hruaitu pawl pehtlaih lo ding cun lamzin dang aum lo, ASEAN Conference khalah kai theinak covo an nei ve” a ti.

Myanmar ramah ara tlawng ih tuisun December 7 ah Foreign Minister Wunna Maung Lwin thawn an tongaw ding, Nay Pyi Daw a fehnak san cu Min Aung Hlaing thawn an tongaw tum ruangah si an zum.

Leitlun ramkhel thuhla theitu pakhat in, “MP Hun Sen cu kum 20 lenglo Cambodia ramsung thuneihnak latu a si, thuneihnak latu veve an si ruangah Myanmar ralhrang pawl hi a theithiam ih ara pehtlaih tum a si ding. MP Hun Sen cu an ram mipi pawl ih duhnak a ruatsak dah lo, Myanmar mipi pawl hrangah beisei ding aum lo” a ti.

Be the first to comment

Leave a Reply

Your email address will not be published.


*