Cardinal Charles Bo In, “Ralkap Pawl Hrangah Thlacam Uh, Minung Sinak Lo Ih Cangvaitu Pawl Parah Minung Sinak Langter Uh, Himi Hi Ralnehnak Tumbik A Si” A Ti

Cardinal Charles Bo in Sunday sunah Myanmar mipi pawl a hnem ih ralkap pawl hrangah thlacamnak nei ringring uh’ a ti. Cardinal Charles Bo in “Huatawknak in thilṭha a suahpi dah lo, Jesuh le a dungthlutu pawl lawng an to laiah thlisia in a nuai ciamco ih dungthluntu pawl cu mangbang vansang in an um. Asinan Jesuh in ziangtik lai caan khalah zumnak nei ringring dingin a cah.

Myanmar ramsung buainak ah Mindat le Loikaw ah harsatnak tong mipum 120,000 lenglo an um zo. Rawlei ding an nei lo, siivai an nei fawn lo. An cau ih an thinhar zet, khuadai ruahsur lakah caan an hmang rero lai. An thilton cu dungthluntu pawl ih rak tonmi vek a si.

Dungthluntu pawlin Jesuh hnenah “Bawipa, kan hlohral thluh ding hi na poisa lo maw si? tin an rak sut vekin Myanmar mipi pawl khalin kan sut rero lai. Thinlung kekkuai le beidong pawl ih thusut ṭheumi a si, zangfahnak nei lo ralkap pawlin minung tam zet an that zo.

Thawnginn sungah hremnak phunphun tuar in mi tampi an ṭap rero lai, thawnginn sungah mitthli thawn “Bawipa, kan hlohral thluh ding hi na poisa lo maw si?” tin minute tinten an sut. Pathian in a mipi pawl a tlansan maw si ti thusutnak cu simfiang a har zet.

Myanmar ramsung ih thilthleng ruangah Pathian cu a itthat maw si ti thlemnak nan tong ding. Jesuh in a dungthluntu pawl hnenah “thlisia hrang lak khalah zumnak nei ringring uh” a ti. Kan zumnak cu kan lungawi caan lawng hrangah a si lo, thimkhuazing sungih kan um caan khalah kan arsi tleu a si.

Zumnak cu hmuh theih silo kan tep thei, kanmah lawngih kan um caan khalah zumnak in thazang in pe ringring. Ziangkim kan tlaksiat lai caan khalah zumnak in beiseinak thar in pe, siatnak rapthlak bik kan tong caan khalah zumnak in Pathian hmaiah kan um ti in theihter.

Tuarnak in beiseinak thar a suahpi ṭheu, zumtu hmaisa pawl khal hremnak phunphun an rak tuar ve. An kai ih an that, martyrs an tuar. Colosseum hmun ah kiosa an eiter, asinan an lakah Pathian aum ti an thei ringring. Tuarnak phenah lungawinak aum ti an theifiang, zankhuathim caan cu a sau nan zing khuavang caan a thlengsal ṭheu.

Jesuh in nan ral pawl duhdawt uh, a lo hremtu pawl hrangah thlacam ringring uh’ tin in zirh. An lawng nuaitu thlisia cu huatawknak a si, huatawknak cu huatnak thotho in an lehrul asilen rahṭha a suahpi dah lo ding.

Myanmar ramsung buainak cu huatnak ih thungrul asilen Myanmar ram cu tipi sungah a pilhlo ding. Meithal thawn miuk tumtu pawl cu anmah vek siloin lamzin dangin kan do a ṭul, minung sinak lo ih cangvaitu pawl hnenah minung sinak langter kung. Caanṭha pe uh, ka suah ihsin Myanmar ram cu arak buai zo.

Ralkap pawlin thlacam saktu an ṭul mamawh tuk, an thinlung thleng danglamnak dingah thlacam sak ringring an ṭul. An hrem, an do rero mi pawl cu an ral an si lo ih an mipi pawl an si ti an theihfiang awk theinak dingah thlacam sak uh.

Christian lawng siloin, Myanmar mipi zaten in ralkap hrang thla kan camsak a ṭul, thlacamnak in minung thinlung a thleng danglam thei” tin thlacamnak nei ringring dingin mipi pawl a sawm.

Be the first to comment

Leave a Reply

Your email address will not be published.


*