CDF In Surkhua RC Father le Pastor An Thlahsal

Surkhua RC Father Noel Hrang Tin Thang le Dumva RC pastor Clement Cung Hnin cu August 4 sun ah CDF-Hakha in an thlahsal thu theih a si.

RC Father Noel Hrang Tin Thang le pastor Clement Cung Hnin cu ralkap thawn an pehtlaih ih Hakha ah ralkap pawl va tong dingin an feh an ti ruangah July 26 sun ah CDF-Hakha in lamzin ah an rak kai.

Ṭhaten inn pakhat ah an ret ih ei le in ding khal an pe, thu khal an sut ih an phuangaw ve. August 4 ah CDF-Hakha le RC biaknak lam upa pawl an tonaw khawm. CDF-Hakha ih nganmi capi ah RC biaknak lam upa pawlin lungkimnak hmin an khen hnuah RC Father le Pastor cu an suah zalen.

Capi sungah CDF-Hakha in dilmi 4 an nei ih RC biaknak lam upa pawlin an cohlang. Cupawl cu (1) Father (Noel Hrang Tin Thang) in ralkap pawl pehtlaih lo ding. (2) CDF-Hakha thuhla cu diklo zetin lenglam ah suah lo ding & thuthang pe lo ding.

(3) Hakha ah (Noel Hrang Tin Thang) ih hnaṭuan mi ṭhial (cawlhter) ding. (4) Tender a lakmi ṭuan lo ding tipawl a si. Father Noel Hrang Tin Thang le Clement Cung Hnin cu Surkhua ah himdamten an thlengfel zo. (#The Chin Journal)

Be the first to comment

Leave a Reply

Your email address will not be published.


*