CDM tuah ralkap Kaung Set Lwin cu People Defence Force Yamethin (Y-PDF) ah a tlanlut, caan tawkfang aum hnuah ralhrang pawl hnenah a kirsal ih an sakhan umnak cu a sim thei ih a hruai. PDF pawl an rinawk lo laitak ah an va siim ih sakhan cu an urkang.
July 30, 2022 sun nazi 2:00 hrawngah Mandalay, Yamethin peng, Intaing khua kiangih um Y-PDF sakhan cu an va nuai ih sakhan sungih um cerek, ei le in pawl khal an urkang sak thluh ruangah sumpai ting 200 man hrawng an sung.
Y-PDF ṭuanvo neitu in, “Phatsantu uico Kaung Set Lwin cu bike thawn rawlhmeh la dingih ava feh ih uico ralkap hnenah a kir. July 30 sun nazi 2:00 hrawngah uico ralkap pawl a hruai ih sakhan an siim. Hmun dangdang ah cangvai dingin kan thenawk laitak ah in ra siim ruangah minung kan dai aw lo ih meithal a thlauawk tuk ruangah sakhan cu kan suahsan” a ti.
Mipi phatsantu Kaung Set Lwin cu Meiktila hrambun BEME ih ralkap pakhat a si ih April 2022 ah CDM tuah in Y-PDF hnenah a tlanlut. Sakhan siimnak ah mipi ralkap hliamtuar le mithi an um lo ih an tlansuak thluh man.
Leave a Reply