CDM Tuah Chinpa In Ralkap Kuthnuai Ih A Thilton Mi, A Tuar Thei Lo Mi A Relsuak

Hakha hrambun, ralkap ihsin tlansuak ih CDM tuahtu Salai Hin Lian Piang in ralkap kuthnuai ih a thiltonmi pawl cu mipi hmaiah a rel. Cumi lakah a thilton pakhat cu “Ka tuar thei lo” a ti. May 9, 2021 ah ralkap pawlin kum 57 mi Pu Tler Ling le kum 27 mi Pu Kham Bawi cu an kai.

Pu Tler Ling cu leilet ih a hnaṭuan laiah an va kai, cun Hakha ih ra tlawng duak Pu Kham Bawi khal a thlennak riahbuk sungah an kai. May 11 ah ralkap pawlin Pu Tler Ling cu Covid-19 in a damlo ih Kalaymyo siizung lam ih an phur laiah lamlak ah a thi tin a innsang pawl hnenah an sim.

Pu Kham Bawi khal cuap lam damlonak ruangah Kalaymyo siizung ah a thi ih Pu Tler Ling thawn an urkang thu May 12 sun ah sakhua lam upa pawl hnenah an sim thei. May 11, 2021 ah Myanmar Alin thuthang sungah Pu Tler Ling cu thisen sang natnak in a thi, Pu Kham Bawi khal cuap lam damlonak in a thi tin thuthang diklo in an tarlang.

Himi thilthleng zaten CDM tuahtu Salai Hin Lian Piang in arak hmu thluh, Pu Tler Ling le Pu Kham Bawi cu thildang ruangih thi an si lo ih ralkap hremnak ruangih thi an si sawn.

Salai Hin Lian Piang in “Ka tuar thei lo bik mi cu Hakha ah khuasung mi 2 an kai. Nitinten mi cu an kai ko, himi pahnih cu an vuaknak ruangah an thi. Mithi ruak cu Glucose siivai an thlaih ih motor thawn Kalaymyo lamah an phur. Kalaymyo siizung ah an at ih an urkang.

Sibawi pawl hnenah an thihnak thuhla cu diklo zetin an nganter ih an ngan duh lo, curuangah an hringhro ih an nganter. An thihnak cu damlonak ruangah tin an nganter, himi thilthleng pawl hi ka hmu thluh ih a nung Pathian biatu ka si vekin ka um anuam thei lo. Annih zumlotu pawl thawn hnaṭuan tlang dingin thazang ka nei nawn lo, a rei tikah cun ka beidong. Pathian theilotu, zumlotu pawl thawn hnaṭuan tlang ding cu ka thei nawn lo…” a ti.

Be the first to comment

Leave a Reply

Your email address will not be published.


*