CDM Tuah Tlawng Sayama An Kah That Mi In A Fapa Kum 1 Mi A Fehsan

Sagaing, Homaline khua ih um CDM tuah tlawng sayama Ma Hnin Hnin Aye cu October 24, 2021 simlam ah ralkap lamtang minung pathum in an kap that. A fapa kum 1 mi a fehsan ih a nu ngai in a ṭap rero. Ma Hnin Hnin Aye hi miṭha le mifel zet a si ih tlawngta nauhak pawl khalin an ngaina thei zet, hnaṭuan a cawlh caan ah bazar ah thil a zuar ṭheu.

CDM a tuah ruangah ralkap pawlin kaih an tum ih a pilepu tei inn ah ava tlan ih cutawk ah an kap that. Ramlak ih um Ko Kyaw Win Sein in “Simlam nazi 6:30 hrawngah motor var pakhat cu kan inn hmaiah ava dingih motor sung ihsin minung pathum an suak. Meithal in kan inn cu an kap ciamco ih kan zaute ih to ka mo cu an kap that, ka mo in sualnak zianghman a tuah lo” a ti.

Ko Kyaw Sein Win cu dothlennak ih a tel ruangah September 15 ah a nulepa in an fapa sinak ihsin an hlon. October 24 sun nazi 1:00 hrawngah dalan hminthang, Pyu Saw Htee hruaitu Maung Moss cu zo ti theih lo minung pahnih in meithal in an kap that.

Ralkap pawlin Ko Kyaw Sein Win cu dalan Mg Moss kap thattu ah an put ruangah an inn cu an va kap ciamco. Ko Kyaw Sein Win in “Homalin ih dalan hminthang, Pyu Saw Htee hruaitu Maung Moss cu zo ti theih loin an that. Maung Moss cu khualak ah ka hmu ṭhiṭha hrih lo ih an thatnak thuhla khalah kei thawn pehtlaih awknak aum lo.

Khualak ah hmuaw khalsehla keimah sawn in that ding, himi thuhla ah pehtlaih awknak zianghman nei lo ka mo cu meithal in veithum an kap ih a thi” a ti. Amah ruangah a mo a thi cu a riahsia tuk ih hlei ah a nulepa in an fapa sinak ihsin an rak hlon zo ruangah ramlakah ninghang riahsia in aum rero lai.

Be the first to comment

Leave a Reply

Your email address will not be published.


*