Chin Mipi Kilhimtu In Ralkap Motor 7 An Kap Siat

October 14 ah Falam ihsin poksuak ralkap motor 60 le tank 2 cu Chin mipi kilhimtu CNA le CNDF / CDF pawlin Hakha lam feh thei lo dingin lamzin ah an rak kham. Taal khuapawn ah an kapaw ciamco ih ralkap motor 7 a siat thluh, minung 15 in hliam nazet an tuar.

Falam-Hakha lamzin ih tang ralkap pawl le Chin mipi kilhimtu pawl cu an kapaw rero lai. Tuizing (October 16) khalah Taal khua ihsin Falam lam ih kirsal tum ralkap hliamtuar 15 phurtu motor le ke ih kirsal ralkap 40 cu Lungpi khua kiangah an rak kap ih Falam lam kir thei loin an um.

Hmin tarlang lo mipi kilhimtu pakhat in “Ralkap pawl feh thei lo dingin lamzin kan phit. Kan kap phahphah. Meithal, pukpi le bomb pawl an kap rero nan hliamtuar le mithi kan um lo” a ti. An kahawknak ah mithi paziat an um ti cu theihfiang a si lo nan ṭuanvo neitu in mithi cu an tam zet ding a ti.

Mizan ah Falam-Hakha lamzin ih tang ralkap pawl va bawm dingin Hakha ihsin ralkap pawl an poksuak ih Hakha khua suah zawngah CNA le CDF in an rak kap ciamco ruangah Hakha ah an kirsal.

Falam le Hakha karlak ih an hrentang mi ralkap pawl cu mipum 400 lenglo an si ding, dunglam le hmailam feh thei loin Chin mipi kilhimtu pawlin an kulh thluh. Mindat le Matupi karlak lamzin, tiva kiang khalah mipi kilhimtu CDF pawlin ralkap pawl an rak kap ih hmainor thei lo dingin an tuah. (The Chinland Post)

Be the first to comment

Leave a Reply

Your email address will not be published.


*