Chin National Organization (CNO) Ih A Voikhatnak Conference Thusuah

“Chin National Organization (CNO) in a voikhatnak Conference cu 2022 April ni 20 ihsin ni 23 tiang CNO/CNDF Headquarters umnak Chinram, Camp Rihli ah hlunghlai zetin kan tuah a si. Conference lairelnakpi ah CNO/CNDF ih ṭuanvo neitu pawl, advisor pawl, Ramsung/Ramleng ih CNO/CNDF dinpitu le bawmtu pawlkom ih palai pawl, CDMers Group ihsin ṭuanvo neitu pawl le technician pawl telin Conference palai mi 119 le Observer 80 hrawng, zate kom in mi 200 hrawng kan tel a si.

(1). Conference Lairelnak ah Chin National Organization le Chin National Defense Force in a neihmi Department dangdang pawl ih kumkhat sung cangvaihnak pawl report peknak, Sumpai thuhla report peknak, kumkhat sung hnaṭuan zomi pawl parah thlirsalnak le hmailam kekar danding thuhla pawl relkhawmnak neih a si.

(2). Chin National Organization (CNO) ih Constitutions & By-Laws, TOR le Policy pawl zohtlang in nemhngetnak neih a si.

(3). Dictatorship system a hram ihsin ṭhiatbal dingin le Federal Democracy ngah theinak ding hrangih a ṭulmi Mipi mahtei’ ukawknak cu CNO/CNDF ram sungah a rang thei bikih ṭuansuah theidaan policy le khuakhannak pawl kan khiahfel thei a si.

(4). Chinram kilhimnak le Humhimnak hrangah Chin National Defense Force thacak sinsin ding in CJDC ih a telmi peng, hmunram tinih dinmi kilhimnak pawlkom dang pawl thawn kom-aw in hmual a neimi ṭuantlangnak pawl tuah vivo dingin kan relcat.

(5). CNO/CNDF dinhmun in Ṭhalpau Dothlengnak ih a thupi zetmi dinhmun ih telmi CDMers pawl thawn Chinram dinsuahnak ah hnget zetih kutkai aw in ralhraang uknak kumrei dinghnget thei dingih a bawmtu a simi Non-CDMer pawl cu nasa ten mawhphurnak pe dingin kan relcat.

(6). CNO/CNDF ram sungih Tender dilnak le hnatuannak pawl cu kan kham ih hnatuan an um asile CNO/CNDF ih a neihmi daan vekin cawhkuannak le daantatnak nei dingin kan relcat.

(7). Ralhrang uknak le dictatorship zaten cemral dingih dothleng caan sungah ralhraang pawl thawn ṭuantlangtu zovek khal siseh, ziangvek pawlkom khal siseh, ralhraang pawl thawn bangran ih retin mawhphurhnak le daantatnak kan tuah ding a si tiah thu kan suah a si”. (#Chin National Organization)

Be the first to comment

Leave a Reply

Your email address will not be published.


*