Chin Ram Le Sagaing Ramsung Ih Ralkap Pawl Hotu Thar, Misual Zet Ih Motor Cu Bomb In An Puah

Myanmar ramsung buainak ah Chin ram le Sagaing ramsung ah ralkap le palik pawl an thi tam zet zo, cun mipi thazang a cak deuhdeuh ruangah Min Aung Hlaing in Chin ram le Sagaing ramsung ih ralkap pawl hotu General Phyo Thant cu a hnaṭuannak ihsin a cawlhter ih a inn sungah an kharhkhum (an kai si ko).

A aiawh ah misual hminthang an timi Lieutenant General Than Hlaing le Special Task Force No. 1 ih ralbawi Lt. Gen. Tay Za Kyaw cu an thlah. Lieutenant General Than Hlaing cu ramkhelh thuhla ruangah amai naupa rori khal a that, a kut sungah sualnak neilo mipi tam zet an thi zo.

Cutin Chin ram le Sagaing ramsung ah ralkap thazang cu an cakter ih mipi kilhimtu pawl nuai nasat an tum. October 16, 2021 zinglam nazi 9:00 hrawngah Sagaing ramsung ih mipi kilhimtu pawlin a motor cu bomb in an rak puah thu theih a si. Lieutenant General Than Hlaing hi a thi le thi lo cu theih a si lo nan palik 12 an thi tin Mizzima thuthang sungah an tarlang.

Lieutenant General Than Hlaing cu Sagaing ramsung Monywa ah umhmun a khuar zo, asinan Nay Pyi Taw ah meeting kai dingin ava feh. Cutin a tlung lamah mipi kilhimtu pawlkom 13 komaw in an rak bawk ih lamzin ah bomb an kam. Ralkap motor cu tam zet an si ih an bomb kammi 4 an pal puak.

Sagaing mipi kilhimtu pawlkom 13 pawl cu (1) Myaung mipi kilhimtu CDSOM, (2) Myaung Special People’s Defense Force – MSPDF, (3) Thinlung Mawi Misual Pawlkom, (4) 27 Revolution Forces. (5) PDF–Taloke, (6) MinHmu Pawlkom, (7) People Defense Force Yesagyo, (8) Sagaing mipi kilhimtu (SGG), (9) Chaung U People’s Defense Force, (10) Monywa People Defence Force – MPDF, (11) Black Eagle Defense Force (MMU), (12) T.G.R le (13) Myingyan Ranger pawl an si. Nay Pyi Taw ih ralkap hmunpi khalin Lieutenant General Than Hlaing ih motor bomb in an puah thuhla an thei zo nan ziang thuhla hman an phuang suak hrih lo.

Be the first to comment

Leave a Reply

Your email address will not be published.


*