Chin Ramsung Ah CDM Tuah Zirhtu 223 In Hna An Ṭuan Sal Tum

Myanmar ramsung buainak cu kumkhat a kim zo ih a ṭha thei hrih lo. Ralhrang pawlin June 2, 2022 ah rampum huap nauhak tlawnginn pawl an ongsal, CDM tuah zirhtu saya/sayama pawl khal an kuthnuai ah hnaṭuan sal dingin an sawm, an hringhro.

June 14 hlanah hnaṭuan sal dingin hmin an peaw asilen hremnak zianghman an pe lo ding thu an tarlang. June 7 tiangah Chin ramsung ah CDM tuah zirhtu tlawng saya/sayama 223 in hnaṭuan sal dingin hmin an peaw.

Chin ramkulh fimthiamnak ṭuanvo neitu in, “Atir ahcun June 7 tiang CDM tuah pawl hrangah caan an ong, asinan tu’ah June 14 tiang an ti sal. Chin ramsung ah June 7 tiangah saya/sayam 223 in hmin an peaw. An mal tuk lai, neta ah hmin peaw an um sal kem maw ti cu kan thei lo” a ti.

Hakha ramsung ah Covid-19 natnei an um nawn lo nan tlawngta nauhak pawl hnenah Covid-19 khamnak siivai an dawt thu theih a si. June 7 sun ah Hakha, အ.ထ. က (၁) tlawnginn ah nauhak kum 5 ihsin kum 12 karlak mi pawl cu Covid-19 khamnak siivai an dawt thu ralhrang thuthang sungah an pholang.

Thudang: Irrawaddy Ah CDM Tuah Zirhtu 60 Lenglo In Hnaṭuan An Dilsal
Irrawaddy ramsung ah CDM tuah tlawng saya/sayama 60 lenglo cu ralhrang kuthnuai ah hnaṭuan sal dingin hmin cazin an pe. Ralhrang in CDM tuah saya/sayama pawl cu hnaṭuan dingin nan kirsal asilen nan hnakel nan ngahsal ding tin May 16 ah an phuang.

May 31 tiang hmin pek a theih an ti nan Irrawaddy ramsung ahcun June 7 tiang hmin cazin pek a theih lai an ti sal. Ralhrang pawlin hnaṭuan sal dingin nan kir asilen a hlan ih nan ṭuanmi vek nan ṭuansal thei ding, CDM nan tuah sung caan cu thlahlawh nan ngah lo ding. Nan ṭuan thok ni ihsin thlahlawh nan ngahsal ding. Thubuai khal tuahsak nan si lo ding’ an ti.

Ṭuanvo neitu in, “CDM tuah hnuah hnaṭuan sal tum saya 23 le sayama 40 an um zo. Ramkulh zungih form ap hrih lo hmin cazin pe khal an um lai, an zaten kom cun kan theifiang hrih lo” a ti. CDM tuah saya pakhat in, “Hnaṭuan sal dingih hmin petu pawl khal ka mawhthluk lo. CDM an tuah ruangah hringhronak phunphun an tong, ṭhenkhat cu san um lo tukin an kai. Hnaṭuan dingih hmin petu pawl, fimkhur zet uh.

Ralhrang thu hi zum hlah uh, CDM tuah zotu pawl cu an lo hmuhdan a danglam dingih thil pakhat khat a thleng tikah an lo kai mai ding. Ralhrang cozah kan duh lo ruangah CDM kan tuah. Kei cu mual liamzo saya/sayama, tlawngta pawl mithmai zo in a cemnet tiang CDM ka tuah vivo ding” a ti.

Be the first to comment

Leave a Reply

Your email address will not be published.


*