China Ih Building Sang Bik Pakhat Cu Amahten A Hning Ciamco, Mak Zetin Linghnin Khal Aum Lo

May 18 sun nazi 1:00 ah China, Shenzhen ih building sangpi pakhat cu mak zetin amahten a hning ciamco ruangah a sungih um minung pawl cu an tlansuak thluh. SEG Plaza building a si ih 2000 kum ah an rak sak theh, feet 980 ih sang a si ih a sungah dawr khan phunphun le innluah pawl an um.

Khawpi laitak ih ding a si ih China ramsung ih building sang bik 18-nak a si. A sungah minung a thawngtel an khuasa, an rinlo laitak ah a hning ciamco ih thinphang mangbang in an tlansuak thluh.

Sun nazi 2:40pm ahcun building sungah zohman an um nawn lo ih cozah in an khar, building a hninnak san cu an theithei hrih lo ih mithiam pawlin an zingzoi rero lai. Building a hnin laiah Shenzhen ramsung ah linghnin aum lo ih China ramsung khalah linghnin thuthla theih ding zianghman aum lo ruangah mak an ti zet.

Cun, building a hnin laiah thli khal a hrang lemlo ih 27mph lawngin thli a hrang, thlihrang ih thazang amal tuk ruangah building cu a hninter thei lo ti a si. Inndot 14-nak ih um Ji Jialin in “Suncaw kan ei laitak ah building cu a hnin ciamco ih elevator khal kan hmang ngam lo, step in kan tlanṭum thluh” tin South China Morning Post hnenah a sim.

Ziangtik ah building cu an ongsal ding ti theih a si hrih lo, China ramah building cim thuhla theih ding a tam zet zo. Innsaktu engineer pawl ih thiam lo ruangah a si an ti ṭheu.

2020 May thla khalah Quanzhou ih building pakhat a cim thutthi ih a sungih um minung 29 an thi, 2008 kum ah nasa zetin ling a hnin ih building tampi a cim ruangah minung 69,000 lenglo an rak thi zo.

Be the first to comment

Leave a Reply

Your email address will not be published.


*