China In, “Ukraine Ramsung Buainak Hi Naitakten Kan Zoh Ringring” A Ti

February 24, 2022 zingthlapit ah Ukraine le Russia cu an kapaw ciamco ih mithi le hliamtuar tam zet an um. Simlam ahcun China a ṭongsuak ve thlang.

China ramdang pehtlaihtu Hua Chunying in, “Ukraine ramsung buainak hi naitakten kan zoh ringring. Ukraine ramsung buainak hi ṭuanvo neitu pawlin thilṭulmi pawl nan tuah lohli a ṭul, control a theih nawn lo mi buainak ih a suak hlanah nan control lohli a ṭul” a ti hnuah US le a hnaṭuanpi ram pawl cu a soisel.

“Nangmah pawl ih thiltuahmi ruangah himi buainak hi a suak. Ram pakhat le pakhat cu upat ṭihzah aw tawn kan si, doawknak sosang tertu cu kan dokalh a si” a ti. Ukraine ramsung ih um ramdang mi pawl cu an khua le ram ah tlun dingin an koaw rero.

Asinan China’s Embassy in Ukraine ramsung ih um China mipi pawl cu nan innsung ciar ah um uh. Innsung ah China thantar zar uh, nan vahsuah a ṭul asilen nan motor ah China thantar zar uh” tin thu an suah. China le Russia hi rualpi ṭha zet an si ih ramdang pawlin Russia sumdawngnak an phitsak nan China thawn sum an dawngtlang.

Russia in Ukraine ram a kah hlan, tui thla zarh hmaisa lamah Russia president Putin cu China ramah ava tlawng ih Beijing Winter Olympics a hmang. Cutawk ah China president thawn an tongaw. Hua Chunying cu media picang in thu an sut ih ‘Russia in a thiltuah tummi hi China hnenah a simcia maw?” an ti.

Hua in, “Russia cu ram zalen a si ih an thazang khal a ṭha. A thiltuah tummi ah China hi a simcia a ṭullo, amahten a tawlrel aw thei. Ralthuam khalah China in zianghman a bawm lo” a ti. Russia le Ukraine ram an buai rero laiah China in Taiwan ram laksal a tum ve pang ding ti leitlun mipi pawlin an phang zet.

Be the first to comment

Leave a Reply

Your email address will not be published.


*