China Ram Ih Hnaṭuan Kawlram Mi Cu A Damlo Besia Tuk Ruangah An Phur Tlung, An Khua A Thleng Veten A Thi

Shan State, Namtu khuami Lue Yisang Mong (kum 38) cu China ram, Chinshwehaw ah hnaṭuan in aum. 2021 kum ihsin hnaṭuan in aum zo ih a fapa kum 12 mi Mai Min Aung a cawm. A damlo ringring hnuah a natnak hi x-ray in an zoh ih kal (kaileng) natnak ti an thei.

China ram ah an tuamhlawm ding asilen sumpai tampi an cemliam a ṭul ruangah an khua ah tlung dingin an tawlrel. Ralhrang pawl ruangah an tlung lohli thei lo, a damlo besiat tuk hnu lawngah an tlung thei ih an khua a thleng veten a nunnak a cem.

A tunu in, “A tir ahcun a thawsam in aum ṭheu, thawsam natnak men ah kan ruat ih siivai a in ṭheu. A besia deuhdeuh ih ziangvek rawl khal a ei asilen a luaksuak thluh, zianghman a ei thei nawn lo. Siizung ah x-ray an zoh ih kal natnak ti an thei.

China ram ah kan tuamhlawm ding asilen zarkhat ah veikhat siivai pek a ṭul ding. Veikhat siivai man ah China sumpai 5000 a si, thlakhat ahcun veithum veili hrawng kan paihawk a ṭul ding. Siivai man a khung tuk, kan thlahlawh thawn a mil aw lo ruangah Kawlram ah tuamhlawm dingin kan tlunpi tum” a ti.

Kawlram ah tlunpi dingin a naunu le pawlin palik sakhan ah theihternak an va tuah ih Kawlram lam ih palik pawlin an cohlang lo, zarhkhat hnu lawngah an cohlang ding thu an rak sim thei. Nihnih nithum hrawng an hngak bet hnuah Lue Yisang Mong cu a besia, biak a theih nawn lo.

Curuangah China ramsung ih um Myanmar Embassy hnenah bawmnak an dil ih Muse ih um mibawmtu pawlkom pawl an pehtlaih. Hitin bawmnak an dil vivo hnuah an tlung theisal. Muse mibawmtu pawlkom ah an khua Namtu tiang an phur ih khua an thleng veten a nunnak a liam.

Be the first to comment

Leave a Reply

Your email address will not be published.


*