Biakinn Le Sikhan Ah Alakin Damlo Pawl Tuamhlawmtu An Kai

November 22, 2021 zinglam ah ralkap pawlin biakinn le a kiangih sikhan cu an va lutchilh ih alakin damlo pawl tuamhlawmtu 18 cu an kai ih thubuai orhter dingin an buaipi rero lai. Kayah State, Loikaw khawpi, NawYa vengsung ih um biakinn le sikhan cu ralkap pawlin an va luthnawh ih sibawi 3 le nurse 14 cu daan vekin hremnak pe dingin an hruaisuak.

An kaihmi sibawi 2 le nurse 4 cu CDM tuah an si ih March thla ahkhan ralkap pawlin pukmah 505 thubuai an orhter ih kai dingin an hawl rero mi an si, an relh ringring hnuah hitin ralkap pawlin an kai ngah.

Nurse 10 le midang pawl cu CDM tuah an si lo, thlahlawh ngah ringring lai an si ih an man caan ah hitawk hmun ah alakin damlo pawl an va tuamhlawm ṭheu. CDM tuah sibawi pahnih cu Dr. Phyo Maung Maung le Dr. Barbara Nge Nge an si.

CDM tuah nurse 4 cu Naw Phaw Mu, Su Sandy Htwe, Daw Jemana le Naw Lwe pawl an si. Anmah ra bawmtu nurse 10 pawl khal an kai. Loikaw Catholic Bishop telin tualsung mi 13 le pastor 13 khal an hruai. Damlo an tuamhlawmmi 48 le motor 4, bike 14 pawl khal an la. Ralkap pawlin doawknak ih hliamtuar, damlo pawl cu daanpahbal in an rak tuamhlawm tin thubuai an orhter thluh.

Be the first to comment

Leave a Reply

Your email address will not be published.


*