Christian Fala Cu Lungto In An Deng That Hnuah An Urkang

Nigeria, The Shehu Shagari College ih tlawngta pakhat cu Prophet Muhammad a relsia tin lungto in an deng that hnuah a ruak cu an urkang. Tlawngta Deborah cu Christian mi a si.

An class pawl umkhawmnak Whatsapp group sungah sakhuanak thuhla an post ringring ruanagah Deborah in, “Himi group cu thuhlolak relnak dingih tuahmi a si lo. Himi group cu exam hrang thusutnak ding, assignments tuahnak ding a si. Thuhlolak relnak ding group a si lo” tin ca a thlah.

Sakhua dang pawlin an zumnak, an sakhuanak hmuhsuam ah an rak ruat ih velh an tum. Deborah cu an tlawnginn room pakhat sungah a relh ih tlawnginn security pawlin an kil. Asinan, tlawngta thinheng an tamtuk ruangah an kilhim thei lo.

Muslim sakhua pawlin a relhnak room ihsin an dirsuak ih an vel ciamco. An vuak, lungto in an deng ih a thi. A ruak cu an urkang, a relhnak tlawnginn building khal an urkang. Tulai Africa ramsung ah a thuhla a thang zet ih tualthattu pawl cu hremnak nazet pe dingin an au.

Deborah thatnak ih tlawngta pawl kaihruaitu mi pahnih cu palik pawlin an kai zo, midang khal an hawl rero lai. Nigeria ram ah sakhua thuhla ruangah nunau 4 an that zo.

2017 kum khalah Christian tlawng sayama cu nam in an dawt that. Exam tuahnak room sungah tlawngta pakhat cu cabu thawn a lut, tlawng sayama in a cabu zaten a laksak ih lenglam ah a hlon, a cabu lakah an cabu thianghlim Qur’an aum ruangah sakhua hmuhsuamnak tin nam in an dawt that.

Be the first to comment

Leave a Reply

Your email address will not be published.


*