Christian Pasalṭha 20 In Nunnak Thapin China Ramsung Ah Bible Ting 10 Lenglo An Phurlut, Pathian A Cangvai

Christian pawl hmuhsuamtu, dodaltu lakah China ram hi an hminthang zet. June 18, 1981 ah Christian pasalṭha minung 20 in an nunnak thapin China ramsung ah Bible 1,000,000 zat an phurlut cu Christian san thuanthu ah theih ringring ding mi a si.

Mao’s Cultural Revolution a lal lai 1960-1970 kum sung cu China ramah Christian sakhua hi nasa zetin an rak do, Bible khal an urkang thluh. Bible koltu cu thih asilolen damsung thawngthlak a si. Christian an dokalh zet nan’ an pung deuhdeuh, asinan Bible siar ding an nei lo ruangah leitlun huap zumtu pawlkom Open Doors hnenah Bible siar ding an ṭul thu an theihter.

Open Doors pawlin sumpai an khong khawm ih a rang theibik in Bible cu an tuah, United States ramsung ah Bible cu China ṭongin an let ih sun le zan cawl lo ih hna an ṭuan hnuah an thehsuak thei. China Bible cu 1,000,000 in an sersuak ih a ritlam cu tons 232 in a rit.

Ṭha zetin an tuam thluh ih tidai sung khalah siat thei lo dingin an tuampit thluh, an phurnak lawng sia khalsehla Bible cu tidai sungih pil thei lo dingin an tuah. Himi rawngbawlnak cu “Project Pearl” tin an ko, Open Doors sung ihsin Bible phurtu ding minung 20 an hrilsuak. Bible cu lawng tumpi in an phur ih US, San Francisco ihsin an poksuak.

Hong Kong tipikap an thleng hnuah China ramsung ih phurlut ding an si, China ram ih zumtu pawl thawn a thupten an biaaw cia ih June 18 zan hrawngah China tipi kap an thleng ding thu an sim thei. China tipikap cu ralkap le tipi ralkap pawlin an kil thepthep ringring, cun hmun hlanpi zohnak light tower khal aum.

Nazi 1 sung lawng tipikap ah caan an nei thei dingih cumi sungah an thiar thluh tengteng a ṭul. China zumtu pawlin tipikap ih hramrul lakah an rak hngak ringring. Bible phurtu Gabriella in “Kan poksuak ding ni ara thleng ih thih le nung karlak ih um ti kan theiaw. Bible kan phur ruangah in that maw, damsung thawng kan tla thei ti khal kan theicia thluh. Asinan, rawngbawlnak ropi zet ti kan thei ih zohman dungsip kan tum lo” a ti.

June 18, 1981 zan cu a dai reprep ih tipithuanthum parah thlithiangte a hrang ziarzo, tipikap ih um China zumtu pawl khal hramrul lakah an thupi an suah rero. Lawng parih um pawl khal thlacam phah in hmailam an pan vivo. Tipikap an va thleng cu Pathian kutcak a lang, tipikap ah ralkap le security zohman an rak um lo.

Zandang ahcun an um thepthep nan himi zan ahcun zohman an rak um lo cu thilmak zet a si. Nazi 1 sung lawng um thei ding cu nazi 2 sung lenglo an um ih lawng parih Bible cu an thiar lohli. An thawmvang khal a ring zet nan kiangkap um pawlin an theithei lo. Neta ih an zingzoinak ah tipikap kiltu ralkap, security le light tower parih um pawl cu a thupten party an rak tuah ih zu an intlang.

Zu an ri tuk ih tipikap an va fehsal ahcun an itthat cih ti an theisuak. Bible tam sawn cu an thiarsuak ih China ramsung hmun dangdang ah an kuat man, a thaizing ah an sulhnu pawl cu ralkap in an hmu ih zingzoinak an nei cih.

Neta ih lak dingah tin tipikap ih an thupmi Bible thenkhat cu China ralkap pawlin an hmu ih an urkang, asinan a tam sawn cu an thiarsuak man. Cun, himi cangvaihnak ih tel China zumtu upa thenkhat khal an kai. Bible phurtu Christian pasalṭha 20 cu hlawhtling zetin an ram ah an kirsal thei, an Bible phurmi ihsin China ramsung ah zumtu an pung deuhdeuh ih tuini tiang a rahsuak cu mipi in an ei rero lai. (#Christian Today)

Be the first to comment

Leave a Reply

Your email address will not be published.


*