Christian Mah Le Mah That Aw Hi Vanram An Kai Kem? An Piangthar Ahcun An Kai Ding’ Tin An El Aw

Thinharnak, beidonnak phunphun ruangah mah le mah an that aw ṭheu. Ṭhenkhat cu damlonak nasa zet, misual kutsung ih thih ding aiin an that aw sawn. Ram ṭhenkhat ahcun damlo besia zual, natuar rero pawl hrangah mah le mah thatawknak cetpi an tuahsak.

Christian pahnih cu ‘chirstian mah le mah that aw hi vanram an kai kem?” tin an el aw. Jonathan cu ahlan ah zumlotu, sakhuanak nei lo arak si. Tu’ahcun Christian cangan thiam pakhat a si.

Jonathan in, “Minung thihnak in kan zumnak a khihhmuh lo. Minung thihnak hi vanram le hellram thuṭhentu a si lo. Efesa 2:8-9 ah ‘Ziangahtile nannih cu Pathian zangfahnak zarah zumnak in rundam nan si. Hi rundamnak hi nan ṭuannak ruangih nan ngahmi a si lo, Pathian ih laksawng a si. Cuhrangah zo hman porh awk ding a si lo’ tin an ngankhum.

Zumlotu cu amah le mah a that aw asilen hellram ah a tla ding, amah le mah a thatawk ruangah hellram ih tla a si lo. Jesuh a zumlo ruangah hellram ah a tla. Cuvek thotho in Christian khal a that aw asilen vanram a kai le kai lo ding cu a zumnak ah a thum aw.

A thatawknak in vanram a kai le kai lo ding hi lai a rel lo. Pathian in kan sualnak pawl in ngaithiam thei. Ka piangthar, asinan ka nupi lakah ka rak rinum lo. Ka uire laiah ka thi thutthi asikhallen vanram ah ka kai ding. Rundamnak cu kan thiltuah mi a si lo” a ti.

Rawngbawltu McDowell cun, “Christian mah le mah that aw cu vanram an kai lo ding. Pathian in sual sir aw pawl lawng a ngaidam, mah le mah that aw pawl cu an thilsual tuah mi ah sirawknak caan an nei lo. Sual sirawknak tello zumnak cu cohlang a si lo ding.

Vanram kan kainak ding cu kan zumnak ih kan tlanlen dan, Pathian kan pehtlaihnak ah a thum aw. Mah le mah that aw cu sual rapthlak zet a si, Pathian in a duh lo. Christian cu sual tuah ding kan si lo, sualnak ihsin tlan sawn ding kan si. Jesuh vekih nung ding kan si” a ti. Rawngbawltu pawl lak khalah an el aw ṭheu.

2013 kum ah rawngbawltu hminthang Kay Warren ih fapa cu thinharnak ruangah amah le mah a that aw. A nu in, “Ka fapa hi a tleirawl laiah rundamnak a co. A nunnak cu Jesuh kut ah a hlan zo. Ka fapa hi 100% in vanram ah aum ti ka thei” a ti.

September 9, 2019 ah pastor kum 30 mi Jarrid Wilson cu a that aw. A thatawk hlan te ah hitin ca a ngan, “Jesuh ih duhdawtnak in beidonnak zaten a damter thluh lo. Jesuh ih duhdawtnak in natnak le thatawk duhnak a rehter lo. Asinan, kan kiangah aum ringring ih hnangamnak in pe” a ti.

Be the first to comment

Leave a Reply

Your email address will not be published.


*