Cikha Khua Ih Covid-19 Natnei Pawl Cu Khualtlawng Vak Sukso Khal An Si Lo, Naupai A Thi, Sibawi Pawl CDM Ih An Lut Ruangah An Daihaw Lo

Myanmar ramsung a buai laiah Covid-19 natsia a hrang sal cu a beidong thlak zet. India-Myanmar ramri ih um Chinram, Tonzang Township, Cikha khua cu Covid-19 in a nuai ciamco ih Tonzang ramsung ah Covid-19 natnei 82 an um zo.

May 28 ah naupai kum 38 mi cu Covid-19 nat anei ti an hmusuak ih Cikha siizung ah an tuamhlawm nan sunday zan (May 30) nazi 11:35pm ah a na tuar loin a pasal le a fate 3 cu a thihsan.

Dr. Thang Sian Khaing in “Damlonak dang anei lo” a ti, Myanmar ralkap pawlin Covid-19 ruangah Tonzang le Sagaing Region, Tamu khua cu innsung ah kharhkhum aw dingin stay-at-home thu an phuang zo.

Tonzang Township, Cikha khua ah May 30 sun lawngah Covud-19 natnei thar 25 an hmu ih 10 cu an bese ruangah ICU ah ventilators bun in an tuamhlawm rero lai. Damlo pawl ih sulhnu an zohsal tikah hmun dang ih khualtlawng ṭheu an si lo thu theih a si, tuiṭum Covid-19 nathrik cu India ram ihsin ra lut si an zum.

Dr. Thang Sian Khaing in “Covid-19 ruangah India ram cu lockdown thu an phuang zo, ramri khal an phit thluh. Asinan, a thupten ramri paltlangtu pawlin nathrik an rung kenglut a si ding ti kan zum” a ti.

“Siivai le damlo tuamhlawmtu siibawi kan tlasam tuk, siizung ih hnaṭuan pawl khal CDM ih an rak lut ruangah kan daihaw lo. Damlo pawl cu khua dang siizung in an cohlang lo ruangah kan refer thei lo” a ti.

Myanmar ralkap in tuiṭum ih Covid-19 cu nathrik thar a si le si lo an zohdik lai, ralkap in thuneihnak an lak hlanah nitinten 16,000-18,000 zat Myanmar rampum huap Covid-19 swab tests an rak nei ṭheu. Asinan, ralkap in thuneihnak an lak hnu ihsin nitinten 1,500 to 2,000 hrawng lawng an test.

Be the first to comment

Leave a Reply

Your email address will not be published.


*