CNF/A Le ZRA An Kap Aw

Chin State, Tedim Township, Gawsing khua kiangah CNF/CNA le ZRA pawl an kapaw tin Khonumthung Burmese thuthang sungah an tarlang. December 17, 2021 zingpit nazi 3:00 hrawng ihsin an kapaw thok. Gawsing khua cu Tedim ihsin peng 30 hrawng a hla ih India-Myanmar ramri ih um khua a si.

Tuizing ih an kahawknak ruangah khuami 2 in hliam an tuar ih an khawsen in an tlan thluh. Tualsung mi pakhat in, “Zingpit nazi 3:00 hrawng ihsin an kapaw thok ti kan thei, khuasung mipi pawl cu an tlan thluh an ti. Khuasung mi pahnih in hliam an tuar thu kan thei” a ti.

Kiangkap um į¹­henkhat in, “CNA pawlin Tedim ramsung ih um ralhrang pawl an va kap ih cutawk ah ZRA cu ralhrang lamtang in an rak kap ve ruangah CNA thawn an kapaw” an ti nan media in nenhngetnak ngaingai anei hrih lo.

ZRA pawlkom cu 1993 kum ah an rak dingih 2005 ah India cozah thawn remnak tuah in hmin an khen hnuah Manipur ramsung ah umhmun an khuar ih ramri kil in an tlangleng. ZRA in Tedim ramsung ih um tualsung mipi kilhimtu pawl hi an rak hnaihnok ringring ih an hruaitu pakhat khal an kap that zo.

ZRA ih cangvaihnak cu Chin hriamkai pawlkom Chinland Join Defense Force (CJDF) khalin nasa zetin an mawhthluk ih ralrinnak an rak pe zo. Tuizing an kahawknak thuhla cu Khonumthung Burmese media in CNF/CNA lam an pehtlaih tum nan thusuh an remcang hrih lo.

Be the first to comment

Leave a Reply

Your email address will not be published.


*