CNF Umnak Lam Ih Umhmun Khuar Ralkap Pawl Hmundang Ah An Feh

June 9 zanlam 4:00 in 5:00 karlak ah ralkap 100 hrawng cu Thantlang peng, Sopum khua an thleng ih umhmun an khuar, ral a tho pang ding ti an phang ruangah khuasung mipi pawl cu hmun dangah an tlan.

Vanzang le Zahnak tlang lamah ralkap 50 hrawngin umhmun an khuar, Thantlang lam ihsin khualutnak Bethel Thlacamnak hmun ah ralkap 50 hrawngin umhmun an khuar.

Ke in an feh ih an thilri, ei le in pawl cu motor tumpi ke 12 nei in a phur, ziangtik tiang an um tum ti cu theih a si lo nan thilri bungrua an keng tam zet. Asinan, zankhat an riak hnu June 10 zinglam ah hmun dangah an tlansal tin khuasung mi pawlin an rel.

Sopum khuami in “Mizan ih ra thleng ralkap pawl cu tuizing ah an tlansal, an zaten 103 an si. Ralkap pawl cu ke in an feh ih Thantlang lamah an liam, an thilri pawl cu motor in a phur. Khuitawk an feh tum ti kan thei lo” a ti.

Sopum khua cu ahlan cozah laiah CNA ram ih rak hminsin mi a si, ralkap pawl umhmun an va khuar cingcing ruangah buainak a suak pang ding ti mipi in an phang.

Be the first to comment

Leave a Reply

Your email address will not be published.


*