Congo Meitlang Puak Ah Minung 32 An Thi, Inn Le Lo Tampi A Siatsuah

Africa, Congo ramsung ih Mount Nyiragongo meitlang cu May 22 zarhte zan ah a puak ih a kiangkap ih um minung 32 an thi. Inn le lo tampi a siatsuah ih khua 12 cu mipi in an suahsan.

Mount Nyiragongo meitlang cu leitlun ih meitlang ṭihnung bik a si ih an rinlo laitak ah a puak ṭheu. 2002 kum ah nasa zetin arak puak zo ih minung 100 hrawng an thi.

Mount Nyiragongo kiangih um Goma khua in an tuar nasa bik, meisa ti lava cu khuasung ah an luan ciamco ih lamzin pawl an phit thluh.

Monday tiangah lava pawl cu an sa lai ih an khu rero lai, lava ti ruangah a kiangkap ih khua pawlin meisa an nei lo ih nauhak pawl khal tlawng an kai thei lo.

Khua sungah an lut ngam hrih lo ih ṭhenkhat cu lamzinkap ah an riak, khuasung mi pakhat in “Ziangtik lai caan khal meitlang a puak cingcing ruangah thinphang in kan um ringring” a ti.

Be the first to comment

Leave a Reply

Your email address will not be published.


*