Covid-19 Volunteer An Kai, A Nunnak Hrang Thinphang Um

Yangon, Sanchaung Township, Mong / Taung veng sungih um tlangval kum 17 mi Maung San Ye Htut cu bomb puak thuhla ruangah rinhlelnak in August 28 zan ah an kai. A innsang pawlin an pehtlaih thei nawn lo ruangah a nunnak hrang an thinphang tuk.

A innsang pawlin “August 28 zan nazi 11:00 ah an ra kai, ralkap pawlin bomb puak thuhla ruangih an kaih thu an rel. Ralkap pawl an rat tikah inn ah arak um lo, inn ah aum lo ruangah hmun dangah a relh tinak a si lo.

Mibawmtu a si ih zung ah aum ringring, May thla ihsin inn ah aum tuk nawn lo ih mibawmtu hna a ṭuan. PPE kor hruh in mithi ruak a thiar ṭheu, Covid-19 positive pawl a tuamhlawm ih zung ah aum ringring.

An inn ah ralkap pawl an um ih a nu cu thu an sut rero, cutin thu an sut laitak ah arun phone ih long speaker an onsak. A nu thawn an biakawk laiah ralkap in “Maung San Ye Htut na si maw?” tin a sut thutthi ih “Si ee” a ti. Ralkap in “Na silen inn ah ra tlung hngal aw, na ra tlung lo asilen na nu hi kan kai ding” a ti.

Inn ah ava tlung hngal ih an rak kai, a nulepa khal Sanchaung No. 24 Police Station ah an hruai ve ih a thaizing August 29 ah an suahsal, a zingah a nulepa cu Sanchaung No. 24 Police Station ah an va fehsal ih an fapa cu arak um nawn lo.

Ralkap in Shwepyithar thusutnak hmunpi ah an kuat thu arak sim thei. A innsang pakhat in “Kan seherh tuk, bomb puahnak ah a tello. Mibawmtu mino cu diklo zetin an ra kai. Kan pehtlaih thei nawn lo, Shwepyithar ah teh aum ngaingai kem maw ti kan thei lo.

A umnak khal kan thei nawn lo ih kan thinhar tuk, kum 17 khal a kim hrih lo ih a thlaṭem zet ding. Tui caan ah ziangtluk in a thinhar ding, bomb puahnak ah a tello nan tel a ti hlanlo an vuak, velh, hringhronak ruangah ziang a cang ding. Ni 3/4 liamzo ah ralkap pawlin mithi ruak cu ting 10 in an tlensuahter timi thuthang kan thei ih hivek dinhmun kan thleng ve pang ding tin kan thinhar tuk. Tutiang kan pehtlaih thei hrih lo” a ti.

Be the first to comment

Leave a Reply

Your email address will not be published.


*