Covid-19 Volunteer In Naupai Ruak An Va La Ih A Thilton Cu ‘Ziangtik Hmanah Ka Hngilh Nawn Lo Ding, Ka Hnasung Ah A Cam Ringring Lai’ A Ti

Covid-19 Volunteer pawl hi upat an tlak zet, anmah khal damlo thei, thi thei an si nan an nunnak hlan in mipi hrang hna an ṭuan. Covid-19 Volunteer pakhat in a thilton cu “Ka damsng ka theihhngilh nawn lo ding” a ti.

Volunteer in “Ka cau tuk ih ka kut khal an thia thei, asinan tuisun ih ka thilton ruangah ka itthat thei lo. Veng pakhat ah mithi ruak la dingin in ko, naupai lai a si ih a pum sungih um naute cu thla 4 a kim zo.

A kiangah a fanu kum 2 mi arak um ih a nui ruak lak cu a siang lo, ṭap khal a ṭap lo nan a nui ruak lak cu a siang lo lawlaw. Kan lem rero ih kan lem thei lo, a pi in ara hruai ih a ṭap ciamco.

Mithi cu thawsam ih thi a si ruangah Covid-19 ih thi si kan zum ih a ruak cu plastic bags sungah kan ret cu a fanu kum 2 mi in a duh lo tuk ih a ṭap ciamco. Motor sungah kan ret ih motor sangka kan khar veten a pi kutsung ihsin a talsuak ih ara tlan.

A pi in ara dum ih a kaibet, nauhak te cu motor kiangah “Ka nu, ka nu…” tin a ṭap rero. A pi in “Na nu hi a damlo ih siizung ah an va tuamhlawm ding, a dam ṭhat veten ara tlungsal” tin a bum ih a ziaum deuh.

A pa ka hmu lo ruangah a pi hnenah ka sut ih zarhkhat liamzo ah a pa in arak thihsan zo, a pai ruak an lak ṭum khalah a damlo ih siizung ah an fehpi ding tin an rak bum zo. Tuitiang ara tlung nawn lo ruangah a nu khal lak a siang nawn lo a ti.

Motor awn a theih veten nauhak kum 2 mi cu a ṭap, a rak ciamco. Kan fehliam tiang nauhak te ih ṭap aw, “Ka nu, ka nu…” a ti cu ka hnasung ah a cam ringring lai. Ziangtik hmanah ka hngilh nawn lo ding. Na nulepa cu an ra kir nawn ding si lo” a ti.

Be the first to comment

Leave a Reply

Your email address will not be published.


*