Cuba Ram Khal Myanmar Ram Vekin An Buai Thok

Cuba ram ih tipithuamthum parih um tikulh ram pakhat a si. An cozah cu Communist government a si ih ralkap thuneihnak in an feh, caan reipi sung an ram mipi pawl an rak ukbet zo ih tu’ahcun an thangthar nonawl pawlin an tuar thei nawn lo ruangah July 10 sunah lamzawhnak an nei.

2018 kum ihsin an cozah in an ramsung ih internet zaten a control thluh ih an ramsung ahcun WhatsApp, Facebook, Instagram le Telegram pawl an hmang thei lo.

Lamzawhtu pawlin an ram president Miguel Diaz-Canel cu “hnukdawk aw seh, zalennak kan duh. Rawlei ding kan nei lo, siivai kan nei lo, zalennak kan nei lo” tin an au ciamco. Palik le ralkap tam zetin tear gas le thil dangdang in lamzawhtu pawl cu an kap ih an kai.

Zarhpisun an lamzawhnak ah minung 100 lenglo an kai, lamzawhnak ih tel pawl cu kai dingin an hawl rero lai. Donald Trump president arak ṭuan laiah Cuba cozah cu hremnak a pe ih an sumdawngnak pawl a phitsak, President Joe Biden khalin a phelhsak cuang lo ih Cuba mipi lam ih an um thu a phuang.

Cuba ram cu ziangkim ah an tlasia, Covid-19 in a nuai ciamco bet ih an dinhmun cu a sia deuhdeuh ruangah mipi in lamzawhnak an nei.

Cuba president Miguel Diaz-Canel in “US in a thupten cangvaihnak a neih ruangah Cuba mipi pawlin lamzawhnak an nei, US in mi ṭhenkhat a ruai ih lamzawhnak aneihter” tin an ramsung buainak cu US cozah ruangah a ti. Tuiṭum ih duhphorhnak an tuah cu kum dangih duhphorhnak an tuah aiin an turu sawn ih minung khal an tam zet.

Be the first to comment

Leave a Reply

Your email address will not be published.


*