Daan Loin Thailand Ramsung Ih Lut Kawlram Mi 9 Cu An Hnaṭuannak Ah Thlahlawh An Ngah Lo Ruangah An Tlan Ih Palik In An Kai

Kawlram mi 9 cu daan loin Thailand ramsung ah an lut thei. Mae Sot Township, Tak Province cet zung pakhat ah hna an va ṭuan ih thla 2 sung cu alakin hna an ṭuan.

An pu in an thlahlawh a pe duh lo ih hleiah thla 2 sung an ei le in khal a tumsak duh lo, nei lo cingten le midang sumpai cawicop in thla 2 sung cu anmahten an cawmaw ih hna an ṭuan. An hnaṭuan man khal an ngah cuang lo, daan loih um an si vekin an thilton cu palik hnenah an report ngam lo.

Ti ngaihnak an theih nawn lo ruangah motor an sang ih tlung dingin ramri tiang thla dingin an bia, asinan lamzin hrek hrawngah an motor mawngtu in a tlansan ih an vakvai. Ramlakah bags pawl thawn an vakvai lai cu kiangkap um pawlin an rak hmu ih palik hnenah an report. Cutin Thailand palik pawlin an va kai ih Covid-19 nat an nei le nei lo an zohdik hnuah an nei lo ti an thei.

Mipa pakhat le nunau 8 an si ih daan loin Thailand ramsung ih an lut ruangah thubuai orhter dingin palik sakhan lamah an hruai. Myanmar ramsung a buai ruangah Thailand ramsung ih lut an tam deuhdeuh. October thla ihsin November thla lai tiangah Thailand palik pawlin ramri ah daan lo ih lut Kawlram mi 800 lenglo an kai zo.

Be the first to comment

Leave a Reply

Your email address will not be published.


*