Dalan Ruang 5 An Sar

May 31 zanlam ah Gangaw lamzin ah ralkap hnenih thuthup sim ṭheutu minung 5 ih ruang an sar. Ye Hla le South Khayan khua kiangah a si ih minung 5 an thi ih pakhat cu hliam nazet a tuar.

Mithi pawl cu Thintaw khua ih tlawng sayama ṭuanlai Daw Khin Myo Tint, nurse Ma Thida Win, pawlkom hmin cazin ngantu Kyaw Myo Naing, khuabawi U Sein Oo le Hanthawaddy khuabawi U Tar Lu pawl an si. Nurse pakhat Ma The Mar Htwe cu a thi lo nan hliamhma na zet a tuar.

An motor khal urkang a si. Yaw Defense Force (YDF) in “CDM an tuah lo ruangah anmah bat kan si lo. Vengsung mipi ih cangvaihdan pawl an sim ṭheu ruangah sawn a si. Mipi phatsantu an si, an inn khalah ralkap pawl an thleng ṭheu. Thusut fiah dingin an motor kan rak dingter ih an ding duh lo ih in sual sawn, meithal khal an keng ruangah kan ret tha lawlaw” a ti.

A hmun ah ralkap pawl an thleng lohli lo ih a thaisun lawngah ralkap pawl an va thleng, kiangkap um mipi pawl cu ralkap in thu an sutfiah ding ti an phang ruangah hmundang ah an rak tlan thluh zo.

Gangaw ramsung, Ye Lwe khua kiangah mipi kilhimtu PDF le ralkap pawl an doaw rero lai. May 28 ihsin an doaw ih ralkap in Ye Lwe khuasung mi 3 an that hnuah inn pawl khal an urkang. An thatmi lakah ṭong thei lo pakhat a tel, ralkap lam khal tam zet an thi zo.

Be the first to comment

Leave a Reply

Your email address will not be published.


*