Dalan Ruangah Ralkap In An Kap That Ih A Ruang An La Thei Hrih Lo, A Nupi Nau Nei Zikte A Thihsan

Mandalay Division, Bagan khua ih um pacang pakhat cu ralkap pawlin an kap that ih a ruang an la. May 30 zinglam nazi 10:45 ah ralkap pawl cu an vengsung ah an va lut ih mino 6 an kai.

Dalan in meithal an nei tin ralkap hnenih a report ruangah an kai. Pacang Moe Myint Aung khal kaih an tum ih inn sangka arak khar, ralkap pawlin an inn sangka cu an kap siat ih innsung ih um Moe Myint Aung an kap ngah. A pum ah an kap ngah ih a hliamtuar loin a thi.

Vengsung upa in “Dalan in meithal an nei tin thuthang dik loin a report ruangah mino pawl cu an kai ih an vua ciamco. Mino 6 an kai ih Moe Myint Aung cu an kap that, a nupi nau nei zikte a thihsan. Hnaṭuan felfaite ṭuan ih ei hawl an si, tutiang a ruang kan ngah hrih lo” a ti.

An kaihmi mino pawl cu khuitawk hmun ah an hruai ti an thei lo ih an pehtlaih thei hrih lo, Moe Myint Aung ih ruang cu a innsang pawlin an dil rero lai.

Be the first to comment

Leave a Reply

Your email address will not be published.


*