Damlonak Nei Innsang Nu Cu A Awkaw That

Shan State, HoKang khua ih um innsang nu pakhat cu June 7, 2022 sun ah hridai in a awkaw that. Kum 65 mi cu merai nat nei a si ih a talbuai ṭheu, a pasal thawn an ṭhenaw zo.

Khuami pakhat in, “Kum 3 liamzo ihsin merai nat a nei thok. A natnak hi thlatinten a suak ṭheu ih a talbuai ringring, hitin a damlo ṭheu ruangah a thataw si kem maw ti cu kan rel thei lo. Fale a nei ko nan a naunu tei inn ah aum, a fale kiangah aum lo. A naunu tei inn ah a awkaw that” a ti.

Thudang: Ralhrang In Khualtlawng Thei Lo Dingin A Passport An Laksak Hnuah An Innpi A Zuar
Kum 33 mi Nang Mwe San cu Myanmar model hminthang le siibawi hlun a si. Fimthiamnak a zir ṭheh hnuah siibawi a ṭuan ih Shan, Kachin le Rakhine States ah damlo pawl tuamhlawm in arak um ṭheu. Online parah a zuk itum zetzet a tarlang ṭheu hnuah siibawi ihsin a suak.

Siibawi a ṭuan lai aiin a zuk a tarlangnak ihsin thlahlawh a ngah ṭha sawn. Online parih a cangvaih hnuah thlakhat ah $7,000 ihsin $10,000 kiangkap hrawng a ngah ṭheu. Kan dungah hringtu a pa cu a damlo besia in Thailand ram ah an tuamhlawm. A pa umpi dingin Thailand ram ah ava feh tum nan Yangon’s Passport Office in a passport cu an laksak, an pe duh nawn lo. Nang Mwe San in, “An cangvaihdan cu a diklo, a ṭha lo tuk” a ti. Cumi hnuah vanduai thlak zetin a pa in Thailand ram ah a thihsan.

Nang Mwe San in, “Ka pa, ka thinlung sungah na cam ringring. Ka lo duhdawt tuk” tin June 7, 2022 sun ah a tarlang. Tu’ah an runinnpi cu ting 5000 in a zuar ih an biakawkdan ih zir’in a man cu an thum thei. An innpi cu a ṭha zet ih dothnih a si, master khan 3 le single khan 2 aum. Motor retnak tualrawn kaupi aum, an inn umnak cu North Dagon, ahmat (35) vengsung ah a si.

Nang Mwe San hi ramsung buainak ah mipi lamtang a si, ralhrang in thuneihnak an lak pekte ah lamzawhnak ah arak tel ṭheu. A ruangrai a ṭhah ruangah 2022 kum ah “Top Myanmar Sexy Models” ah hriltling a si. Myanmar ramsung buainak ah Nang Mwe San in, “Thuneihnak latu ralhrang pawl hi ka dodal a si. Myanmar mipi pawl cun kan thei thluh, kan san thuanthu ah ralhrang pawl ruangah thil ziangkim kan rak sung/can zo. Tuiṭum ah hlanlai ih thilthleng vek a thleng nawn lonak dingah lamzawh duhphorhnak ah ka tel” a ti.