Damnak Duh Ah Tidam Thei Puithiam Ava Pan Ih Arak Vaw That

India, Bekka khua ih um innsang nu pabik cu a lu naa ringring ruangah mi tidam thei puithiam ava pan ih arak vaw that. Kum 37 mi Parvathi cu thlahnih sung a lu naa, siizung pathum ah ava piahaw nan sibawi pawlin natnak zianghman na nei lo an rak ti.

Asinan, a lu naa cu aum ringring lai ruangah a beidong tuk. An sungkhat pakhat in mi tidam thei puithiam cu a khihhmuh ih December 2 sun ah ava pan. Puithiam kum 42 mi Manu in lemon pakhat arak pe ih thaisun ah rasal aw a ti. A thaisun ah lemon cu kengin ava fehsal ih puithiam in December 7 ah rasal aw arak ti lala.

December 7 zing nazi 10:00 ah ava fehsal ih puithiam in funghreu in arak vuak ciamco, a lu le a taksa dangdang ah a vuak ciamco. Puithiam in hitin a vuak hnuah a damlonak pawl cu an hlo vuarvi ding a ti.

Puithiam in a vuak rero laiah Parvathi cu a tlu tupdi ih lemon juice an pe nan a tho thei nawn lo ruangah an mangbang tuk ih anai bik siizung ah an tlanpi hngal nan reilote hnuah puithiam ih vuaknak hliamhma tuar loin a thi. Puithiam cu arak tlanhlo man, palik pawlin tualthat thubuai in an ngankhum ih puithiam cu kai dingin an hawl rero lai tin India Times le India Express thuthang sungah an tarlang.

Be the first to comment

Leave a Reply

Your email address will not be published.


*